परभणी (वृत्तसंस्था) आयएएस अधिकाऱ्यांच्या बदलीत मोठ्या प्रमाणावर राजकीय हस्तक्षेप असतो हे परभणीतील प्रकाराने पुन्हा एकदा सिद्ध झाले आहे. परभणीचे जिल्हाधिकारी दिपक मुगळीकर हे सेवानिवृत्त झाले. त्यांच्या जागी आयएएस आंचल गोयल यांची नियुक्ती करण्यात आली होती. आज त्यांना पदभार घेण्याच्या सूचना होत्या. मात्र, जिल्ह्यातील काही नेत्यांच्या दबावातून त्यांना पदभार दिलाच गेला नाही.
गोयल या २०१४ च्या बॅचच्या आयएएस अधिकारी आहेत. त्यांची फिल्मसिटीच्या सहव्यवस्थापकीय संचालक पदावरून परभणीच्या जिल्हाधिकारीपदी पंधरा दिवसांपूर्वी बदली झाली. त्या चार्ज घेण्यासाठी परभणीत तीन दिवसांपूर्वी पोहोचल्या. मात्र त्यांच्याविरोधात भलतेच राजकारण शिजत असल्याची त्यांना कल्पनाही नव्हती. गोयल त्यांच्या नियुक्तीनंतर जिल्ह्यातील अनेकांच्या पोटात कळ उठली होती. त्या रुजू होऊ नयेत म्हणून या जिल्ह्यातील काही सत्तारूढ पक्षाच्या नेतेमंडळींनी मोर्चेबांधणी केली होती. त्यांनी त्यांच्या मनाप्रमाणेच त्यांनी घडवून आणले. विद्यमान जिल्हाधिकारी दिपक मुगळीकर हे शनिवारी सेवानिवृत्त झाले. याच बक्षी गोयल सूत्रे स्वीकारणार होत्या. त्यानुसार सारी तयारीही झाली होती. मात्र त्यांना सूत्रे न स्वीकारताच परभणी सोडावी लागली.
थेट आयएएस अधिकारी आणि त्यातही महिला असल्याने स्थानिक नेत्यांना त्या आपल्याला किती ‘सहकार्य’ करतील, याची शंका वाटू लागली. परभणीतील अनेक नेत्यांचे वेगवेगळे उद्योग असल्याने तेथे ‘अडजेस्टमेंट’ महत्वाची ठरून बसते. ते व्यवस्थित होण्यासाठी मर्जीतील अधिकारी येथे आणण्याचे प्रयत्न नेत्यांनी सुरू केले. तसे तातडीने करता येत नाही हे पाहिल्यावर त्यांनी वेगळीच खेळी केली. जिल्हाधिकारी पदाचा पदभार हा कनिष्ठ अधिकाऱ्याकडे दिला जाईल, यासाठी पावले टाकण्यात आली. त्यानुसार शासकीय यंत्रणा हलली आणि तसेच घडले.
जिल्हाधिकारी दीपक मुगळीकर यांना सामान्य प्रशासन विभागाचे सहसचिव अजित पाटील यांचे पत्र प्राप्त झाले. आपल्या पदाचा अतिरिक्त कार्यभार श्रीमती आंचल गोयल (भाप्रसे) यांच्याऐवजी अतिरिक्त जिल्हाधिकारी, परभणी यांच्याकडे सोपवून सेवानिवृत्त व्हावे असे यात म्हटले होते. त्यामुळे जिल्हाधिकारी दीपक मुगळीकर यांनी सायंकाळी त्यांच्या पदाचा पदभार अतिरिक्त जिल्हाधिकारी राजेश काटकर यांच्याकडे सूपुर्त केला.
पालकमंत्री अनत्रिज्ञ
राज्याच्या सामान्य प्रशासन विभागाचे सहसचिव अजित पाटील यांनी पुन्हा एक आदेश काढून जिल्हाधिकारी दिपक मुगळीकर यांना आंचल गोयल याना पदभार न देता अतिरिक्त जिल्हाधिकारी यांच्याकडे पदभार सोपविण्याचे सांगण्यात आले. त्यामुळे आंचल गोयल यांना परभणीतुन परतावे लागले आहे. यात विशेष म्हणजे परभणीचे पालकमंत्री नवाब मलिक यांना आम्ही याबाबत विचारले असता त्यांना या बदली संदर्भात काहीही माहिती नसल्याचे त्यांनी सांगितले आहे.
