जळगाव (प्रतिनिधी) येथील शिवाजीनगर हुडको भागात एका तरुणाला बेदम मारहाण केल्याची घटना घडली आहे. यात तरुण गंभीर जखमी झाला असून त्याला रुग्णालयात उपचारासाठी दाखल करण्यात आले आहे. दरम्यान, मारहाण करणाऱ्यांपैकी एकाने दहशत पसरवण्यासाठी हवेत गोळीबार केल्याचे देखील कळते.
यासंदर्भात अधिक असे की, गजानन विलास बाविस्कर (वय २७) हा तरुण मारहाणीत जखमी झाला आहे. तर मारहाण करणारी टोळी वाल्मीकनगर भागातील असल्याची माहिती आहे. गजानन याने शिवाजीनगर हुडको परिसरात चाकूचा धाक दाखवून दहशत पसरवली होती. सोमवारी दुपारी त्याचे एका जणाशी वाद झाले. यानंतर काही वेळातच वाल्मीकनगरातून एका चारचाकीतून तसेच पाच-सहा दुचाकीने काही तरुण हुडको परिसरात आले. त्यांना पाहून गजानन एक स्वच्छतागृहात लपून बसलेला होता. या तरुणांनी स्वच्छतागृह तोडून त्याला बाहेर काढले. यानंतर बेदम मारहाण केली. यात त्याचे हात-पाय व डोक्यावर गंभीर दुखापत झाली आहे. मारहाण करणाऱ्या तरुणांच्या म्होरक्याने पिस्तूलमधून एक गोळी हवेत चालवून दहशत पसरवली, असे एका प्रत्यक्षदर्शीचे म्हणणे आहे.
अद्याप पोलिसांत नोंद नाही
गजानन याला मारहाण केल्यानंतर टोळी तेथून निघून गेली. तर जखमी गजानन याला शासकीय वैद्यकीय महाविद्यालय व रुग्णालयात उपचारासाठी दाखल करण्यात आले आहे. या घटनेची अद्याप पोलिसांत नोंद झालेली नाही. तसेच वैद्यकीय महाविद्यालयाकडून पोलिसांना एमएलसी पाठवण्यात आलेला नाही. दरम्यान, गोळीबाराची घटना घडली नसल्याचे पोलिसांकडून सांगण्यात येत आहे. शिवाजीनगर हुडकोत घडलेल्या या प्रकारामुळे पोलीस चौकशी करीत आहेत.
