जळगाव ( प्रतिनिधी ) – घरी बसून रेटींग देण्याच्या कामावर कमिशन देण्याचे अमिष दाखवून अमोल शांताराम पाटील (वय ३६, रा. गाढोदा, ता. जळगाव) यांची २ लाख ९२ हजार रुपयांमध्ये फसवणूक करण्यात आली. ही घटना दि. १ ते दि. ५ जानेवारी दरम्यान घडली. या प्रकरणी दि. ११ एप्रिल रोजी तालुका पोलिस ठाण्यात देण्यात आलेल्या फिर्यादीवरून सुरज कुमार नाव सांगणाऱ्या व्यक्तीसह इतरांविरुद्ध गुन्हा दाखल करण्यात आला आहे.
जळगाव तालुक्यातील गाढोदा येथील शेतकरी अमोल पाटील यांच्याशी सुरज कुमार नावाच्या व्यक्तीने संपर्क साधून घरी बसून काम देण्याचे अमिष दाखविले. यात काही रक्कम गुंतवून ऑनलाईन रेटिंगचे काम केल्यास त्यावर कमिशन देण्यात येईल, असे त्यांना सांगण्यात आले. यासाठी त्यांच्या टेलिग्राम अॅपवर एक लिंक पाठविण्यात आली. ती त्यांनी ओपन केली व त्यावर नोंदणी केली.
कमिशनद्वारे संपादन केला विश्वास
त्यानंतर समोरील व्यक्तीने त्यांना गुंतवणूक करण्यास सांगितले. त्यानुसार सुरुवातीला १० हजार, २० हजार अशी रक्कम गुंतविल्यानंतर त्यांना ७०० ते ८०० रुपये कमिशन देण्यात आले. त्यातून त्यांचा विश्वास संपादन करीत त्यांच्या बँक खात्याची माहिती घेतली.
वाढीव रक्कम येत नव्हता काढता विश्वास संपादन केल्यानंतर
वेळोवळी रक्कम गुंतविण्यास सांगितल्याने अमोल पाटील यांनी गुंतविलेल्या रकमेवर त्यांच्या नावे तयार झालेल्या वायलेटमध्ये वाढीव रक्कम दिसू लागली. मात्र ती काढता येत नव्हती. तसेच पाच दिवसात एकूण २ लाख ९२ हजार ३६३ रुपये गुंतवूनही रक्कम परत मिळत नव्हती.
पोलिसात धाव घेत दिली तक्रार
आपली फसवणूक झाल्याचे लक्षात आल्यानंतर अमोल पाटील यांनी तालुका पोलिस ठाण्यात फिर्याद दिली. त्यावरून सुरजकुमार व इतरांविरुद्ध गुन्हा दाखल करण्यात आला आहे. पुढील तपास पोहेकॉ दीपक चौधरी करीत आहेत.
