धरणगाव (प्रतिनिधी) मंत्री गुलाबराव पाटील यांचे चिरंजीव तथा माजी जिल्हा परिषद सदस्य प्रतापराव गुलाबराव पाटील यांच्या ३५ व्या वाढदिवसानिमित्त बी.एम. ग्रुप, पाळधी आणि रेड प्लस ब्लड बँक यांच्या संयुक्त विद्यमाने भव्य रक्तदान शिबिराचे आयोजन करण्यात आले होते.
“रक्तदान हेच श्रेष्ठदान” या उदात्त संदेशातून आयोजित करण्यात आलेल्या या उपक्रमाला नागरिकांचा उत्स्फूर्त प्रतिसाद लाभला. विशेष म्हणजे, या शिबिरात सुमारे ७० रक्तदात्यांनी रक्तदान करून सामाजिक बांधिलकी जपली.
प्रतापराव पाटील यांचे मतदारसंघातील शिवसैनिक व युवासैनिकांशी घट्ट नाते असून, प्रत्येक कार्यकर्त्याशी ते आपुलकीने वागत असल्याने या उपक्रमात युवकांनी मोठ्या संख्येने सहभाग नोंदवला. “भाऊ प्रत्येकाला रक्ताच्या नात्याने जोडतात,” या भावनेतून अनेकांनी रक्तदानासाठी पुढाकार घेतला.
कार्यक्रमादरम्यान सर्व रक्तदात्यांचा पाण्याचा जार व प्रमाणपत्र देऊन गौरव करण्यात आला. हे प्रमाणपत्र केवळ सन्मानाचे प्रतीक नसून सामाजिक जबाबदारीची जाणीव दर्शवणारे असल्याचे यावेळी नमूद करण्यात आले.
या प्रसंगी मंत्री गुलाबराव पाटील व प्रतापराव पाटील यांनी उपस्थित राहून रक्तदात्यांचे कौतुक केले. तसेच शिवसेना उपमहापौर मनोज चौधरी, जिल्हाध्यक्ष विष्णू भंगाळे, माजी सभापती मुकुंद नन्नवरे, शिवसेना वैद्यकीय मदत कक्षाचे जिल्हाध्यक्ष डॉ. मोईज देशपांडे, परवेज देशपांडे, सचिन पवार, युवासेना धरणगाव तालुका अध्यक्ष दीपक भदाणे यांच्यासह उद्योजक शरद कासट, धनराज कासट, वासुदेव पाटील, पप्पु भावे, विलास महाजन, मनोज पाटील, जनार्दन आप्पा, पी.आय. पवार साहेब आणि अनेक मान्यवर उपस्थित होते.
या रक्तदान शिबिराचे आयोजन बी.एम. ग्रुप पाळधी यांच्या वतीने करण्यात आले होते. कार्यक्रमाच्या यशस्वीतेसाठी प्रतापराव पाटील मित्रपरिवार, जी.पी.एस. मित्रपरिवार, विक्की बाबा युवा मंच, युवासेना जळगाव ग्रामीण, शिवसेना वैद्यकीय मदत कक्ष आणि शिवसेना जळगाव ग्रामीण यांनी अनमोल सहकार्य केले.
