जळगाव (प्रतिनिधी) जिल्हा दूध उत्पादक संघाची निवडणूक महाविकास आघाडीने एकत्र लढवण्याचा निर्णय घेतला आहे. या निवडणुकीत 41 पैकी मविआचे 20 उमेदवार देण्यात येणार आहेत. दूध संघाच्या निवडणुकीबाबत मंगळवारी आदर्शनगरातील रोहिणीताई खडसे यांच्या निवासस्थानी मविआ नेत्यांची बैठक झाली. बैठकीनंतर पत्रकार परिषदेत मविआ नेत्यांनी एकत्र लढण्या बाबतच्या निर्णयाची महिती दिली.
दूध संघाची सत्ता मिळवण्यासाठी गलिच्छ राजकारण : खडसे
मंत्री, आमदार, खासदार आहेत तरीही छोट्या दूध संघाची सत्ता मिळवण्यासाठी गलिच्छ राजकारण चाललेले आहे. याविषयी मतदारांमध्ये चीड दिसली. त्यांनी कितीही लक्झरी लावल्या, कितीही प्रलोभने दाखवली तरी त्यांना बळी पडणार नाही. राज्यभरात गुंडागर्दी, झुंडशाही सुरु आहे. त्याचा तीव्र शब्दात निषेध करतो. आम्ही पेट्यांची, खोक्यांची, लक्झरीची भाषा करत नाहीत्यांचे चांगल्या हेतूने दूध संघाकडे लक्ष नाही.त्यांना काहीतरी मिळवयाचे आहे. दूध संघाच्या मागच्या बाजूला 70 एकर शेती आहे. त्यावर त्यांचा पूर्वीपासून डोळा आहे. दीडशे एकर जमीन दूध संघाकडे आहे.
खडसे यांना वगळून चालणार नाही, ते महाविकास आघाडीचे पॅनलचे प्रमुख : डॉ.सतीश पाटील
माजी आमदार डॉ.सतीश पाटील हे आमच्या पॅनलमध्ये असल्याचा दावा भाजपकडून करण्यात आला होता. त्यावर माजी आमदार डॉ.सतीश पाटील यांनी उत्तर दिले. त्यांनी पाच ते सहा वेळेस फोन केले. सर्वसमावेशक सर्वपक्षीय पॅनल तयार करण्याचा त्यांचा प्रस्ताव होता. जर तरची भाषा असताना ते पॅनल होणार नाही,असे सांगितले. आम्ही चार ते पाच लोकांना घेवू, ते भाजपचे पॅनल असेल अशी भाषा त्यांनी काल परवा सांगितले. तालुकास्तरावरुन ओबीसीमध्ये अर्ज दाखल केलेला आहे.विधानसभा जेव्हा लागेल तेव्हा लागेल. आमदारासमोर लढूनच समोर येणार आहे. ती पूर्वतयारी आहे. इकडे तिकडे जायची गरज नाही. खडसे यांना वगळून चालणार नाही. ते महाविकास आघाडीचे पॅनलचे प्रमुख आहेत. अजूनही वेळ गेलेली नाही. सन्मानाने सर्वपक्षीय पॅनलचा प्रस्ताव येत असेल तर आमची तयारी असल्याचे डॉ.पाटील यांनी सांगितले.
बैठकीला यांची होती उपस्थिती
या बैठकीला आमदार एकनाथ खडसे, विधानसभेचे माजी सभापती अरुणभाई गुजराथी, जिल्हा बँकेचे चेअरमन गुलाबराव देवकर, आमदार अनिल पाटील, माजी खासदार वसंतराव मोरे, शिवसेनेच्या वैशाली सूर्यवंशी, सुनील महाजन आदी उपस्थित होते. माजी आमदार डाॅ.सतीश पाटील आमच्यासोबत असल्याचा दावा भाजपकडून करण्यात आला होता. तो दावा फोल ठरवत डॉ.पाटील हे बैठकीला उपस्थित होते. काँग्रेसचे जिल्हाध्यक्ष प्रदीप पवार बैठकीला येणार होते.