नवी दिल्ली (वृत्तसंस्था) केंद्र सरकारने ८ नोव्हेंबर २०१६ रोजी देशात नोटाबंदी लागू केली होती. त्यानुसार देशात काळा पैसा आणि बनावट नोटा चलनातून थांबविण्याच्या ५०० आणि १००० रुपयांच्या नोटा चलनातून बंद करण्यात आल्या होत्या. मात्र, आता चार वर्षांनंतरही पुन्हा बनावट नोटा चलनात आल्याची धक्कादायक माहिती समोर आली आहे. दरम्यान, देशात जप्त करण्यात आलेल्या बनावट नोटांमध्ये सर्वाधिक संख्या २००० रुपयांच्या नोटांची आहे.
इंग्रजी वृत्तपत्र ‘द हिंदू’ने प्रसिद्ध केलेल्या वृत्तानुसार, सर्व राज्ये आणि केंद्रशासित प्रदेशांकडून मिळविलेल्या डाटामध्ये असे म्हटले आहे की, २०१८ च्या तुलनेत २०१९ मध्ये सर्वाधिक बनावट नोटा जप्त करण्यात आल्या आहेत. एनसीआरबीच्या म्हणण्यानुसार, २०१९ मध्ये देशात एकूण २५.३९ कोटी रुपयांचे बनावट भारतीय चलन जप्त करण्यात आले. तर २०१८ मध्ये हा आकडा केवळ १७.९५ कोटी होता. सरकारी आकडेवारीनुसार, २०१९ मध्ये दोन हजार रुपयांच्या एकूण ९०५६६ बनावट नोटा जप्त केल्या आहेत. त्यातील बहुतेक नोटा कर्नाटक, गुजरात आणि पश्चिम बंगालमधून जप्त करण्यात आल्या होत्या. मोठ्या संख्येने बनावट नोटा जप्त केल्या जात असून २००० रुपयांच्या नोटांखेरीज मागील वर्षी ७१ हजारहून अधिक १०० रुपयांच्या बनावट नोटा जप्त करण्यात आल्या. ज्यामध्ये सर्वाधिक दिल्ली, गुजरात आणि उत्तर प्रदेशमधील होत्या.
