जळगाव (प्रतिनिधी) तालुक्यातील जळगाव खुर्द येथील शासकीय कोविड रुग्णालयात धरणगावच्या एका संशयित कोरोनाबाधित रुग्णांची हेटाळणी होत असल्याचा धक्कादायक प्रकार उघडकीस आला आहे. संशयित रुग्ण अपंग असून त्यांची पत्नी मागील दोन दिवसापासून उपाशीपोटी प्रत्येकाकडे मदतीची याचना करत होती.
या संदर्भात अधिक असे की, धरणगाव येथील एका अपंग संशयित कोरोना रुग्णाची प्रकृती खालावल्यानंतर धरणगावचे लोकनियुक्त नगराध्यक्ष निलेश चौधरी यांनी तात्काळ रुग्णवाहिका उपलब्ध करून देत, त्यांची शनिवारी दुपारी गोदावरी रुग्णालयातील कोविड सेंटरला रवानगी केली होती. परंतू शनिवार दुपारी दोन वाजेपासून रुग्णालयात बेड शिल्लक नाहीत म्हणून संशयित रुग्णाला बाहेर काढून देण्यात आले होते. तेव्हापासून हे दाम्पत्य कोविड सेंटरच्या आवारातील एका झाडाखाली बसून होते. संशयित रुग्णाची पत्नीने अनेकांकडे मदतीची याचना केली. परंतू कुणीही तिची मदत केली नाही. संतापजनक म्हणजे बेड मिळवून देण्यासाठी ५ हजाराची मागणी केल्याचा आरोप देखील संबंधित महिलेने केला आहे.
