जळगाव (प्रतिनिधी) राष्ट्रवादी काँग्रेसचे नेते एकनाथराव खडसे व भाजपचे नेते गिरीश महाजन यांच्यात दोन दिवसापासून ‘व्हायरल क्लिप’वरून जोरदार आरोप-प्रत्यारोप सुरु आहेत. अगदी ‘फर्दापूर रेस्ट हाऊस’ वरील महाजन यांचे किस्से जगजाहीर असल्याचे वक्तव्यही खडसेंनी केले. त्यानंतर फर्दापूर ‘रेस्ट हाऊस’मध्ये नेमकं काय झाले होते?, याच्या चर्चेला राज्यभर जोरदार उधान आले. त्यामुळे यानिमित्ताने नव्वदच्या दशकात ‘मदिरा आणि मीनाक्षी’ या नावाने माध्यमांमध्ये प्रचंड गाजलेल्या ‘फर्दापूर रेस्ट’ हाऊस प्रकरण नेमकं काय होतं?, हे जाणून घेऊया !
‘सेक्स स्कॅन्डल’ असो की, ‘फर्दापूर रेस्ट हाऊस कांड’ जळगाव जिल्ह्याला अशा कामवासकांडांच्या घटनांचा इतिहास तसा जुनाच आहे. राजकीय मंडळींचा ‘ललना’ प्रेमाचा इतिहास ‘सेक्स स्कॅन्डल’पासून सुरु होतो. त्यावेळीही काही राजकीय मंडळी या प्रकरणामध्ये जेलची वारी करून आले होते. परंतू सोशल मिडिया आणि माध्यमांची ‘ब्रेकिंग न्यूज’ची स्पर्धा नसतांनासुद्धा नव्वदच्या दशकात ‘फर्दापूर रेस्ट’ हाऊस कांड ‘मदिरा आणि मीनाक्षी’ नावाने माध्यमांमध्ये प्रचंड गाजले होते. ‘एका तरुणीसोबत लोकप्रतिनिधीचे अश्लील चाळे’ या आशयावर साधारण महिना ते दीड महिना विविध दैनिकांमध्ये वृत्त मालिका प्रकाशित झाली होती. जामनेरच्या एका बड्या नेत्याचे नाव रेस्ट हाऊस कांडसोबत जोडले गेले होते. अर्थात कुणाचेही उघड नाव समोर आले नव्हते. मात्र, त्यावेळी मोठ्या प्रमाणात काही दिवस राजकीय आरोप-प्रत्यारोप झाले होते.
पहिल्यांदाच लोकप्रतिनिधी म्हणून निवडणून आलेल्या राजकीय व्यक्तीचे एका शासकीय विभागात अभियंता म्हणून कार्यरत असलेल्या अधिकाऱ्याच्या पत्नीसोबत सुत जुळले होते. प्रेम प्रकरण बहरल्यानंतर ते दोघं नेहमी फर्दापूर येथील एमटीडीसीच्या रेस्ट हाऊसवर वेळ मिळेल तसे भेटत होते. एकेदिवशी सायंकाळी नेहमीप्रमाणे प्रेम मिलाप झाल्यानंतर दोघं जण घरी जायला निघाले. परंतू रेस्ट हाऊसवरील शिपायाने कुठल्यातरी कारणावरून लोकप्रतिनिधीसोबत जोरदार वाद घातला.
आपल्या तंत्रित असलेल्या शिपायाने जोरजोरात आरडाओरडा करायला सुरुवात केली. अगदी पोलिसांपर्यंत गंमत पोहोचली. भेदरलेल्या लोकप्रतिनिधीने संबंधित मतदार संघातील आपल्या सहकारी आमदार मित्राकडे मदत मागितली. त्यामुळे ही रासलीला ऑन रेकॉर्ड येता येता राहिली. कमी पैसे देण्यावरून शिपायाने वाद घातल्याची त्यावेळी चर्चा होती. परंतू ‘प्यार छुपे ना खुशबू’….या प्रमाणे अखेर या रासलीलेची दुर्गंधी पत्रकारांना लागलीच. त्यानंतर नव्यानेच जिल्ह्यात दाखल झालेल्या एका वर्तमान पत्राने याबाबत सर्वात आक्रमक वृत्त मालिका चालवायला सुरुवात केली.
फर्दापूर रेस्ट हाऊस कांड जिल्ह्यात लोकं दररोज आता ‘मदिरा आणि मीनाक्षी’ या नावाच्या वृत्त मालिकेच्या स्वरुपात वाचत होते. बातमीत थेट कुणाचेही नाव नव्हते. परंतू वाचकांना बातमी नेमकी कुणाची आहे, हे स्पष्ट कळायला लागले होते. लोकप्रतिनिधी सापडलेल्या महिलेच्या एका मैत्रिणीने यातील अनेक गोपनीय गोष्टी थेट माध्यमांपर्यंत पोहोचवल्या होत्या. त्यामुळे दररोज वेगवेगळी धक्कादायक माहिती समोर येत होती. परंतू या वृत्त मालिकेला जामनेर येथील तालुका प्रतिनिधी माहिती देत असल्याच्या संशयावरून साधारण दोन वेळेस त्या पत्रकाराच्या घरावर अज्ञात लोकांनी दगडफेक केली होती.
आता हळू-हळू या प्रकरणाची जिल्ह्यात जोरदार चर्चा सुरु झाली होती. अगदी विधानसभेतही याबाबत वादळ उठले होते. त्यावेळी खडसे यांनी मदत केल्यामुळे प्रकरण जास्त जोर धरू शकले नव्हते,अशी देखील त्याकाळात जोरदार चर्चा होती. अनेक दैनिकांनी हा मुद्दा लावून धरल्यानंतरही कालांतराने हे स्कॅन्डल मागे पडले. नंतर आरोप फेटाळले गेले आणि कालांतराने हा विषयच पडद्या आड गेला. आज अनेकांना असं काही आणि जिल्ह्यातील अमुक नेत्याबरोबर घडले होते, याबाबत माहिती देखील नाही. परंतू जळगाव जिल्ह्यातील कोणत्याही राजकीय नेत्याचे ललना प्रेम समोर आल्यावर फर्दापूर रेस्ट हाऊस कांड अर्थात ‘मदिरा आणि मीनाक्षी’ प्रकरणाचा उल्लेख होतो म्हणजे होतो !
विजय वाघमारे (9284058683)
