जळगाव (प्रतिनिधी) बिहार निवडणुकीत पालकमंत्री ना. गुलाबराव पाटील यांची तोफ धडाडणार आहे. शिवसेनेने जाहीर केलेल्या स्टार प्रचारकांच्या यादीत मुख्यमंत्री उद्धव ठाकरे, पर्यावरणमंत्री आदित्य ठाकरे, शिवसेना खासदार संजय राऊत यांच्यासह ना.पाटील यांचा समावेश करण्यात आला आहे. दरम्यान, शिवसेना बिहार विधानसभा निवडणुकीत ५० जागा लढवणार आहे.
शिवसेनेने जाहीर केलेल्या यादीतील सर्व नेते निवडणुकांच्या प्रचारसभा घेणार आहेत. ना. गुलाबराव पाटील यांना अलीकडेच शिवसेनेचे प्रवक्ते म्हणून नियुक्त करण्यात आले आहे. बिहार विधानसभा निवडणुकीसाठी शिवसेनेने २० जणांच्या स्टार प्रचारकांची यादी जाहीर केली आहे. यात महाराष्ट्राचे मुख्यमंत्री आणि शिवसेना पक्षप्रमुख उद्धव ठाकरे, पर्यावरणमंत्री आदित्य ठाकरे, शिवसेना खासदार संजय राऊत, सुभाष देसाइ, चंद्रकांत खैरे, अनिल देसाई,विनायक राऊत, अरविंद सावंत, गुलाबराव पाटील, राजकुमार बाफना, प्रियांका चतुर्वेदी, राहुल शेवाळे, कृपाल तुमाने, सुनिल चिटणीस, योगराज शर्मा, कौशलेंद्र शर्मा, विनय शुक्ला, गुलाबचंद दुबे, अखिलेश तिवारी व अशोक तिवारी यांचा समावेश आहे.
