जळगाव (प्रतिनिधी) रेल्वे तिकिटचा काळाबाजार करणार्‍या एकाला आज शहरातील तेली चौक परिसरातून रेल्वेच्या आरपीएफच्या पथकाने अटक केली आहे. पंकज बारी असे अटक केलेल्या तरूणाचे नाव आहे.
डमी आयडी वापरून रेल्वे तिकीटांचा काळाबाजार होत असल्याची माहिती रेल्वे व्हीजिलन्सला मिळाली होती. त्यानुसार पथकाने आज दुपारी बारा वाजेच्या सुमारास शहरातील तेली चौक परिसरात एका घरावर धाड टाकली. संदीप प्रोव्हिजनचा संचालक पंकज आनंदा बारी नामक तरुण रेल्वेच्या तिकिटांचा काळाबाजार करत असल्याचे आढळून आले. आरपीएफच्या पथकाने तत्काळ त्याला राहत्या घरातून अटक केली. दरम्यान, शेवटचे वृत्त हाती आले तेव्हा, गुन्हा दाखल करण्याची प्रक्रिया सुरु होती.
