धरणगाव (प्रतिनिधी) बीएचआर प्रकरणातील मुख्य संशयित सुनील झंवर बाबतीत माजी मंत्री आ. गिरीश महाजन यांनी काही दिवसांपूर्वी झंवर हे माझ्यासह सर्वच राजकीय पक्षाच्या नेत्यांचे निकटवर्तीय आहेत. माझ्याकडे कुणी नाही म्हणून दाखवावं ? असे वक्तव्य केले होते. विशेष म्हणजे या वक्तव्याचे कोणत्याही राजकीय पक्षाने खंडन केले नव्हते. परंतू आता कॉंग्रेसचे प्रदेश सचिव डी.जी. पाटील यांनी महाजन यांच्या वक्तव्याचा चांगलाच समाचार घेतला असून गिरीशभाऊ…सब घोडे बारा टक्के नसतात. त्यामुळे श्री. महाजन यांनी यापुढे फक्त स्वतः किंवा त्यांच्या पक्षापुरता मर्यादित बोलावे, असा सल्ला श्री. पाटील यांनी दिला आहे.
या संदर्भात अधिक असे की, येथील बीएचआर पतसंस्थेच्या सध्या गाजत असलेल्या घोटाळ्यात गेल्या वर्षी नोव्हेंबर महिन्यात डेक्कन पोलीस स्टेशनला गुन्हा दाखल झाला होता. या प्रकरणी पुणे पोलिसांच्या आर्थिक गुन्हे शाखेने मुख्य संशयीत सुनील झंवर यास अटक केली होती. तसेच झंवरच्या कार्यालयात अनेक राजकीय नेत्यांशी संबंधित कागदपत्र सापडले होते. तर झंवरला अटक झाल्यानंतर झंवर हे माझ्यासह सर्वच नेत्यांचे निकटवर्तीय आहेत. माझ्याकडे कुणी नाही म्हणून दाखवावं ? असे वक्तव्य माजी मंत्री आ. गिरीश महाजन यांनी केले होते. विशेष म्हणजे महाजन यांच्या वक्तव्याचे कोणत्याही राजकीय पक्षाने खंडन केले नव्हते. परंतू कॉंग्रेसचे प्रदेश सचिव डी.जी. पाटील यांनी महाजन यांच्या वक्तव्याचा समाचार घेत, झंवरशी ज्याचे संबंध ते कबूल करतील. परंतू घोटाळ्यातील संशयितासोबत विनाकारण इतर राजकीय पक्षाचे नाव जोडू नये. खास करून कॉंग्रेसच्या बाबतीत तर बोलूच नये. अगदी व्यक्तिगत बोलायचे झाले तर सुनील झंवर हा माझ्या तालुक्यातील असल्यानंतरही ते काळे आहेत की, गोरे हे मी पाहिलेले नाही. त्यामुळे झंवरसोबतच्या संबंधांवर महाजन यांनी सर्व पक्षांना गृहीत धरू नये. त्यांचे संबंध असल्याचे महाजन यांनी मान्य केलेय. परंतू सब घोडे बारा टक्के असं समजणे चुकीचे आहे. सर्वजण एका माळेचे मनी नसतात. त्यामुळे यापुढे बोलतांना श्री.महाजन यांनी भान ठेवावे. त्यांच्या सारख्या वरिष्ठ नेत्याकडून असे शब्द शोभत नाहीत, असेही श्री. पाटील यांनी म्हटले आहे.
