चाळीसगाव (प्रतिनिधी) शहरात गजबजलेल्या शिवाजी चौकातील इलेक्ट्रिक दुकान फोडून चोरट्यांनी सुमारे २ लाख ३० हजार रुपये किमतीचे साहित्य चोरून नेले. दरम्यान, पोलीसांनी तपासचक्र फिरवीत अकबर लुखमान खान (रा. टोला वडगाव, ता. आष्टी जि. बीड) या संशयित आरोपीला ताब्यात घेतले आहे.
अजय पीतांबर गेमनानी यांचे गणेश रोडवरील शिवाजी चौकात धीरज इलेक्ट्रिक अॅन्ड इलेक्ट्रॉनिक हे दुकान आहे. २५ रोजी रात्री ९ वाजता अजय गेमनानी हे दुकान बंद करून वडिलांसह घरी गेले. शनिवारी सकाळी ९ वाजता ते दुकान उघडून आत गेले असता दुकानातील साहित्य अस्ताव्यस्त पडलेले दिसले. तसेच छताच्या पंख्याच्या बाजूला पीओपी तोडलेले दिसले. त्यावर असलेले खिडकीतील लोखंडी गज तोडलेले होते. दुकानातील कपाट उघडे होते. पैशांचा ड्रावर पाहिला असता तोही उघडाच होता तसेच त्यात पैसे दिसले नाहीत. दुकानातील काही इलेक्ट्रिक माल लंपास केल्याचे दिसून आले. शहर पोलिसांत गुन्हा नोंद झाला असून पोलिसांनी लागलीच अकबर लुखमान खान या संशयित आरोपीला ताब्यात घेतले आहे.
अडीच लाखांचा मुद्देमाल लंपास
चोरट्यांनी अंदाजे २४०० रुपये रोख, ९ हजार ९०० रुपये किमतीचे ९ नग एमसीबी, ४३ हजार २०० रुपये किमतीचे ४३२ सिंगल पोल एमसीबी, २५ हजार रुपये किमतीचे टपारिया कंपनीचे टूल आणि १ लाख ५० हजार रुपये किमतीची फिटिंगची केबल असा एकूण सुमारे २ लाख ३० हजार ५०० रुपयांचा ऐवज चोरट्यांनी चोरून नेला आहे.
