धरणगाव (प्रतिनिधी) जळगाव रोडवरील श्रीजी जिनिंगला आज दुपारी भीषण आग लागली. या आगीत तब्बल पावणे दोन कोटींहून अधिकचे नुकसान झाल्याचा प्राथमिक अंदाज आहे.
या संदर्भात अधिक असे की, आज दि ९ नोव्हेंबर (सोमवार) रोजी दुपारी एक वाजेच्या सुमारास गारखेडा शिवारातील श्रीजी जिंनिंग फॅक्टरीत अचानक शॉर्ट सर्किटमुळे आग लागली. या आगीत साधारण ३ ते ४ हजार क्विंटल कापसाला आग लागली. प्रति ५ हजार क्विंटल प्रमाणे साधारण पावणे दोन कोटीचे नुकसान झाल्याचा अंदाज आहे. अग विझवण्यासाठी धरणगाव नगरपरीषद आणि एरंडोल नगरपरिषद यांच्या अग्निशमन दलाच्या कर्मचाऱ्यांनी आग विझविण्यास मदत केली. त्याचप्रमाणे जिंनिग कंपाऊंडमध्ये मोठी पाण्याची टाकी आहे. तेथून सुद्धा आग विझवण्यासाठी पाणी घेण्यात आले.
साधारण ३ तासानंतर आग आटोक्यात आली. दरम्यान, या आगीत तब्बल पावणे दोन कोटीहून अधिकचे नुकसान झाल्याचा अंदाज आहे. विशेष म्हणजे मागील १२ ते १५ वर्षात श्रीजी जिनिंगमध्ये लागलेली ही आतापर्यंतची सर्वात मोठी आग मानली जात आहे. याप्रकरणी निलेश चौधरी यांनी दिलेल्या फिर्यादीवरून अकस्मात आगीची नोंद करण्यात आली आहे.
