धरणगाव (प्रतिनिधी) धरणगाव शहरासह एरंडोल येथून अनेक भाजपचे कार्यकर्ते एकनाथराव खडसे यांच्यासोबत राष्ट्रवादीत प्रवेश करण्यासाठी मुंबईच्या दिशेने रवाना होत असल्याची माहिती धरणगाव येथील भाजपचे युवा मोर्चाचे कार्यकर्ते भिमराज पाटील यांनी दिली आहे. दरम्यान, यानिमित्ताने दोन्ही तालुक्यात भाजपाला खिंडार पडल्याचे चित्र आहे.
धरणगाव येथील भाजपचे युवा मोर्चाचे कार्यकर्ते भिमराज पाटील हे एरंडोल येथील अनेक कार्यकर्त्यांसोबत मुंबईच्या दिशेने रवाना झाले आहेत. आम्ही नाथाभाऊवर प्रेम करणारे कार्यकर्ते असून त्यांच्यावर विश्वास ठेवूनच राष्ट्रवादीत जात असल्याची प्रतिक्रिया भिमराज पाटील यांनी दिली आहे. तसेच तिथून परतल्यानंतर गावात अनेक कार्यकर्त्यांचा प्रवेश सोहळा घेणार असल्याचेही त्यांनी सांगितले. दुसरीकडे आज सकाळी खडसे हे पत्नी मंदाताई खडसे, कन्या रोहिणीताई खडसे यांच्यासह मुंबईला रवाना झाले आहेत. तर माझ्यासोबत १५ ते १६ माजी आमदार असून ते माझ्यासोबत उद्या मुंबईत येणार आहेत. एवढेच नव्हे तर काही विद्यमान आमदारही माझ्यासोबत आहेत, पण पक्षांतर बंदी कायद्यामुळे त्यांना पक्ष सोडण्यास अडचण असल्याचा खळबळजनक दावा एकनाथराव खडसे यांनी केला आहे. ते मुंबईला रवाना होण्यापूर्वी पत्रकारांशी बोलत होते.
