मुंबई (वृत्तसंस्था) राज्यात तापमान आणखी वाढणार आहे, अशी माहिती भारतीय हवामान खात्याकडून देण्यात आली आहे. तसेच विदर्भात पुन्हा उष्णतेच्या लाटेचा इशारा देण्यात आला असून कोकण, पश्चिम महाराष्ट्रात 19 एप्रिलनंतर हलक्या पावसाची शक्यताही वर्तविण्यात आली आहे.
राज्यातील वर्धा, अकोला, नागपूरमधलं तापमान 42 ते 43 अंशांवर आहे. तर मराठवाड्यात 42अंश, तर मध्य महाराष्ट्रात पुणे, सोलापुरात ते 40 ते 41 अंशांवर आहे. दुसरीकडे शनिवारी चंद्रपुरात राज्यातलं सर्वाधिक म्हणजेच 44 अंश तापमान होते. तशात आता हवामान खात्याकडून विदर्भात 18 ते 20 एप्रिलदरम्यान, उष्णेची लाट येणार असल्याचा इशारा देण्यात आला आहे. तर कोकण, पश्चिम महाराष्ट्रात 19 एप्रिलनंतर पावसाची शक्यता असल्याचेही हवामान खात्याचा अंदाज आहे.
दरम्यान, वायव्य भारतात अद्यापही उष्णतेची लाट कायम आहे. तेथे तापमानात पुन्हा वाढ होणार असल्याने विदर्भात 18 ते 20 एप्रिल या कालावधीत काही ठिकाणी पुन्हा उष्णतेच्या लाटेचा इशारा हवामान विभागाने दिला आहे. तर राजस्थानसह, पंजाब, दिल्ली, हरियाणा, उत्तर प्रदेश आणि जम्मू-काश्मीर या विभागातही तापमान वाढणार आहे. या भागातून वाहणाऱ्या वाऱ्यांमुळे गुजरात, मध्य प्रदेशानंतर विदर्भातही 18 एप्रिलनंतर उष्णतेच्या लाटेची शक्यता आहे.
