जळगाव (प्रतिनिधी) टुर ॲण्ड ट्रॅव्हल्सच्या नावाखाली जळगावातील डॉ. उल्हास बेंडाळे यांना ११ लाखांचा गंडा घालणाऱ्या टोळीतील तिघांना जळगाव सायबर पोलिसांनी कोलकाता येथून अटक केली आहे. रिकार्डो क्रिस्टफर गोम्स (३६), प्रियांशू सैवाल बिसवास (२३), अनिकेत अभिजित बिसवास (२४, सर्व रा. कोलकाता, पश्चिम बंगाल) असे अटक केलेल्या आरोपींची नावे आहेत.
या संदर्भात अधिक असे की, डॉ. उल्हास बेंडाळे यांनी फेसबुकवर ‘थींकट्रीप ट्रॅव्हल्स’ या नावाची जाहिरात पाहिली. त्यांना आपल्या सहका-यांसोबत सेव्हर सिस्टर पाहण्यासाठी जायचे होते. त्यामुळे त्यांनी जाहिरातीत दिलेल्या फोन नंबरवर संपर्क साधला. समोरील व्यक्तीने ॲडव्हान्स ३ लाख १५ हजार रूपये तसेच टूर बुक झाली म्हणून ७ लाख २० हजार रूपये आणि आरटीपीसीआर व क्वारंटाईन झाले तर हॉटेल बुक करण्यासाठी ६८ हजार ८०० रूपये असे सांगितले. यानंतर बेंडाळे यांनी ११ लाख ३ हजार ८०० रूपयांची रक्कम भरली. परंतू काही दिवसांनी आपली फसवणूक झाल्याचे लक्षात आल्यानंतर १३ मार्च २०२३ रोजी त्यांनी जळगाव सायबर पोलिस ठाण्यात गुन्हा दाखल केला होता.
गुन्हा दाखल झाल्याबरोबर सायबर पोलिसांनी बेंडाळे यांना आलेले फोन, व्हॉटस्ॲप मेसेज तसेच ज्या बँक खात्यात पैसे भरले होते, त्यांची संपूर्ण माहिती घेतली. पोलीस चौकशी ठग कोलकाता येथे असल्याचे कळाले. त्यानंतर पोलिस उपनिरीक्षक दिगंबर थोरात, पोहेकॉ. राजेश चौधरी, दिलीप चिंचोले, गौरव पाटील यांचे पथक ठगांच्या शोधार्थ कोलकाताकडे रवाना झाले. त्यानंतर रविवारी रिकार्डो क्रिस्टफर गोम्स, प्रियांशू सैवाल बिसवास, अनिकेत अभिजित बिसवास या तिघांना अटक करत त्यांच्याजवळून मोबाईल, संगणक हार्डडिस्क, लॅपटॉप, एटीएम कार्ड, चेकबुक तसेच एक शिक्का आदी जप्त केले.
