नवी दिल्ली (वृत्तसंस्था) देशात कोरोनाग्रस्तांच्या रुग्णसंख्येत चढउतार पाहायला मिळत आहेत. गेल्या २४ तासांत आदल्या दिवसाच्या तुलनेत नव्या कोरोना बाधितांच्या संख्येत अल्पशी घट झाली. गेल्या २४ तासांत १३ हजार ०५८ नवीन कोरोनाबाधित रुग्णांची नोंद झाली. तर १६४ कोरोनाग्रस्तांना एका दिवसात प्राण गमवावे लागले.
देशात गेल्या २४ तासांत केवळ १३ हजार ५८ नवे रुग्ण आढळले आहेत. ही रुग्णसंख्या केल्या २३१ दिवसांतील सर्वात कमी रुग्णसंख्या आहे. तसेच १९ हजार ४७० रुग्णांनी दिवसभरात कोरोनावर मात केली असून १६४ जणांच्या मृत्यूची नोंद करण्यात आली आहे. या नवीन रुग्णसंख्येसह देशातील एकूण बाधितांची संख्या ३ कोटी ४० लाख ९४ हजार ३७३ झाली असून आतापर्यंत ३ कोटी ३४ लाख ५८ हजार ८०१ रुग्ण कोरोनातून बरे झाले आहेत. तसेच आतापर्यंत ४ लाख ५२ हजार ४५४ लोकांना कोरोनामुळे जीव गमवावा लागला आहे. देशात सध्या १ लाख ८३ हजार ११८ सक्रिय रुग्ण उपचाराधीन आहेत. ही संख्या गेल्या २२७ दिवसांतील सर्वात कमी आहे. देशाचा रिकव्हरी रेट सध्या ९८.१४ टक्के आहे. तर, विकली पॉझिटिव्हिटी रेट १.३६ टक्क्यांवर असून हा दर गेल्या ११६ दिवसांपासून तीन टक्क्यापेक्षा कमी आहे. तर, डेली पॉझिटिव्हिटी रेट १.११ टक्क्यांवर आहे.
दरम्यान, गेल्या २४ तासांत देशभरात ८७,४१,१६० जणांचं लसीकरण करण्यात आलं. राष्ट्रीय लसीकरण मोहिमेअंतर्गत आतापर्यंत ९८ कोटी ६७ लाख ६९ हजार ४११ जणांचं लसीकरण पूर्ण झालं आहे.
राज्यातील स्थिती
कोरोनाबाधितांच्या दैनंदिन रुग्णसंख्येत घट पाहायला मिळत आहे. राज्यात काल १४८५ नवीन कोरोनाबाधित रुग्णांची नोंद झाली आहे. तर २ हजार ०७८ रुग्ण कोरोनामुक्त झाले आहे. राज्यात आतापर्यंत ६४ लाख २१ हजार ७५६ रुग्णांनी कोरोनावर मात केली आहे. त्यामुळे राज्यातील रुग्ण बरे होण्याचे प्रमाण ९७.४ टक्के आहे. राज्यात आज २७ रुग्णांच्या मृत्यूची नोंद झाली आहे. राज्याचा मृत्यूदर २.१२ टक्के झाला आहे.
