चोपडा (प्रतिनिधी) मध्य प्रदेशकडून चोपडा तालुक्यात गावठी कट्टे घेऊन येणाऱ्या तीन जणांना पोलिसांनी रंगेहाथ पकडले असून अन्य दोन जण मात्र फरार झाले आहेत. हि कारवाई नाशिक येथील पोलिस महानिरीक्षकांचे पथक व चोपड़ा ग्रामीण पोलिस ठाणे यांच्या संयुक्त पथकाने केली आहे.
नाशिक येथील पोलीस महानिरीक्षक यांचे पथक व चोपडा ग्रामीण पोलिसांनी संयुक्त कारवाईत चोपडा ते बोर अजंटी रस्त्यावर तेल्या घाटाच्याखाली दुपारी तीन वाजता एका पांढऱ्या रंगाच्या स्कार्पियो (एमएच १२, एफयू ००६१) या चार चाकी तून अहमदनगर जिल्ह्यातील पाथर्डी येथे राहणाऱ्या गणेश बाबासाहेब केदार (वय २४), कालिदास दत्तात्रय टकले (वय २८), विकास अप्पासाहेब गिरी (वय २२), यांच्या ताब्यातून तीन पिस्तूल व १४ जिवंत काडतूसे तसेच तीन मोबाईल व दाढी करण्याचा वस्तरा असा एकूण ६ लाख ३४ हजार शंभर रुपयांचा मुद्देमाल पोलिसांनी हस्तगत केला. चोपडा ग्रामीण पोलीस ठाण्यात या तिघांना अटक करण्यात आली आहे. याप्रकरणी बशीर तडवी यांच्या फिर्यादीवरून तिघांविरुद्ध गुन्हा दाखल केला आहे. या प्रकरणातील आरोपी विकास गिरी याच्यावर आर्म ऍक्ट व दंगलीचा गुन्हा दाखल आहे. तर कालिदास दत्तात्रय टकले याच्याविरुद्ध सन २०१६ मध्ये दंगलीसह अन्य दोन गुन्हे दाखल आहेत.
यांचा होता पथकात समावेश
या पथकात पोलिस महानिरीक्षक पथकातील पोलिस निरीक्षक बापू रोहोम, चोपडा ग्रामीण पोलिस ठाण्याचे पोलिस निरीक्षक देविदास कुनगर, पीएसआय अमरसिंग वसावे, गणेश जाधव, रामचंद्र बोरसे, सचिन धारणकर, शब्बीर शेख, मनोज दुसाने, कुणाल मराठे, प्रमोद मंडलिक, प्रमोद पारधी, लक्ष्मण शिंगाणे यांचा समावेश होता. या प्रकरणाचा तपास चोपडा ग्रामीण पोलिस ठाण्याचे पीएसआय अमरसिंग वसावे करत आहेत.
