लखनौ (वृत्तसंस्था) एका १५ वर्षीय अल्पवयीन मुलीने राहत्या घरात साडीच्या सहाय्याने गळफास घेऊन आत्महत्या केली आहे. ही घटना उत्तर प्रदेशमधील जौनपूरमध्ये घडली आहे. मृत्यूपुर्वी या मुलीने सुसाईड नोट लिहून ठेवली आहे. बाबा तुम्ही माझ्या मृत्यूच्या बदला त्याच्याकडून अवश्य घ्या, अशी मृत्यूचा बदला घेण्याची इच्छा तिने आपल्या पित्याला व्यक्त केली आहे.
याबाबत मिळालेल्या माहितीनुसार, जौनपूर जिल्ह्यातील सुरेरी पोलीस ठाण्यांतर्गत येणाऱ्या एका गावात राहणाऱ्या एका १५ वर्षीय मुलीला काही तरुण त्रास देत होते. त्यामुळे ही मुलगी खूप त्रस्त होती. दरम्यान, ही मुलगी रात्री झोपण्यासाठी खोलीत गेली. मात्र सकाळी खूप उशिरापर्यंत खोलीतून बाहेर आली नाही. तेव्हा आईने दरवाजा उघडला असता तिला धक्काच बसला. या मुलीने पंख्याला साडीच्या सहाय्याने गळफास बनवून आत्महत्या केली होती.
त्यानंतर आईने केलेला आरडाओरडा ऐकून लोक जमा झाले. दरम्यान, कुटुंबीयांना घटनास्थळावरून एक सुसाईड नोट मिळाली. त्यामध्ये तिने तिच्या मृत्यूसाठी रुस्तमला जबाबदार धरले होते. त्याने आपल्यासोबत गैरवर्तन केल्याचा आरोप मृत मुलीने या सुसाईड नोटमधून केला होता. तसेच माझ्या मृत्यूला रुस्तम जबाबदार आहे. बाब माझ्या मृत्यूचा बदला घ्या, असी विनंतीही केली होती.
दरम्यान, या आत्महत्येच्या घटनेनंतर या मुलीच्या वडिलांनी दिलेल्या तक्रारीवरून पोलिसांनी तीन जणांविरोधात गंभीर कलमांखाली गुन्हा दाखल केला आहे. तसेच या प्रकरणात सहभाग असलेल्या दोन जणांना अटक केली आहे. मात्र मुख्य आरोपी असलेला रुस्तम अद्याप पोलिसांच्या हाताबाहेर आहे. त्याला पकडण्यासाठी पोलीस जोरदार शोधमोहीम राबवत आहेत. मात्र तो पोलिसांना हुलकावणी देत आहे. दरम्यान, या घटनेनंतर परिसरामध्ये तणावाचे वातावरण आहे. त्यामुळे परिसरात मोठ्या प्रमाणावर पोलीस बंदोबस्त तैनात करण्यात आला आहे.
