नवी दिल्ली (वृत्तसंस्था) एके काळी सोविएत रशियाचा भाग असलेल्या आर्मेनिया आणि अझरबैजान यांच्यात लढाई सुरू आहे. या लढाईत तोफा, रणगाडे, क्षेपणास्त्र, हेलिकॉप्टर यांच्या मदतीने थेट एकमेकांवर हल्ले सुरू आहेत. लढाईत आतापर्यंत १६ जण ठार आणि १०० पेक्षा जास्त जखमी झाले आहेत. लढाई सुरू असल्यामुळे जीवितहानीचा आकडा वाढणार आहे. लढाईच्या सुरुवातीला सामान्य नागरिक मारले गेले आहेत, मात्र सामान्यांच्या हानीची सविस्तर माहिती हाती आलेली नाही. आर्मेनियाने देशात ‘मार्शल लॉ’ अर्थात लष्करी कायदा लागू करुन सैन्याला लढाईचे आदेश दिले.
आर्मेनियाच्या संरक्षण मंत्रालयाने एक पत्रक काढून लढाईची माहिती दिली. अझरबैजानच्या सैन्याने स्टेपनकर्ट येथील नागरी वस्तीवर हल्ला केला. या हल्ल्याला प्रत्युत्तर म्हणून आर्मेनियाने लष्करी कारवाई सुरू केली. आर्मेनियाने अझरबैजानची दोन हेलिकॉप्टर आणि तीन ड्रोन पाडल्याचा तसेच तीन रणगाडे नष्ट केल्याचा दावा केला. दावा सिद्ध करण्यासाठी रणगाडे नष्ट केल्याचा व्हिडीओ आर्मेनियाने प्रसारमाध्यमांना दिला आहे.
दोन्ही देशांनी ४ हजार ४०० चौरस किलोमीटर परिसरातील नागोर्नो-काराबाख या भूभागावर दावा केला आहे. आंतरराष्ट्रीय नकाशानुसार नागोर्नो-काराबाख अझरबैजानच्या हद्दीत आहे, मात्र या भूभागावर सध्या आर्मेनियातील स्थानिक सशस्त्र गटांचा ताबा आहे. याआधी १९९१ मध्ये स्थानिक सशस्त्र गटांनी नागोर्नो-काराबाख अझरबैजान पासून स्वतंत्र झाल्याची आणि आर्मेनियात विलीन झाल्याची घोषणा केली होती. अझरबैजानने स्वातंत्र्याची ही घोषणा फेटाळत नागोर्नो-काराबाख आपलाच भूभाग असल्याचा दावा केला होता. याच मुद्यावरुन दोन्ही देशांमध्ये अधूनमधून संघर्ष होतात. पण यावेळी संघर्षाची सुरुवात दोन्ही देशांनी कमालीची आक्रमकता दाखवत केली.
