जळगाव (प्रतिनिधी) शेअर मार्केटमध्ये नफा मिळवून देण्याचे अमिष दाखवत वैद्यकीय व्यवसायिक पंकज विश्वासराव पाटील (वय ४४, रा. निंबोल, ता. जळगाव) यांची १९ लाख चार हजार रुपयांमध्ये ऑनलाईन फसवणूक केली. ही घटना दि. १९ डिसेंबर २०२३ ते दि. २ फेब्रुवारी रोजी दरम्यान घडली. याप्रकरणी दि. ३ एप्रिल रोजी सायबर पोलिस ठाण्यात पाच जणांविरुद्ध गुन्हा दाखल करण्यात आला आहे.
जळगाव तालुक्यातील निंबोल येथे पंकज पाटील हे वास्तव्यास असून त्यांचा वैद्यकीय व शेती व्यवसाय आहे. दि. १९ डिसेंबर २०२३ ते दि. २ फेब्रुवारी या दरम्यान व्हाटसअॅप ग्रुप व फेसबुकवरील अनोळखी लिंकद्वारे पाटील यांची फसवणूक करण्यात आली. यामध्ये संबंधितांनी त्यांना शेअर मार्केटमध्ये नफा मिळवून देतो, असे सांगून त्यांना एक लिंक पाठवली. त्याद्वारे एक अॅप्लीकेशन डाऊनलोड करायला सांगून त्याद्वारे २० लाख रुपयांची गुंतवणूक केली. त्यात पाटील यांना ९६ हजार रुपये परत केले. त्यानंतर मात्र त्यांना कोणताही नफा न देता मुद्दल रक्कमही परत केली नाही.
रक्कम परत मिळत नसल्याने आले लक्षात गुंतवणुक केलेली रक्कम परत मिळत नसल्याने आपली फसवणूक झाल्याची खात्री झाल्याने पाटील यांनी सायबर पोलिस ठाण्यात फिर्याद दिली. त्यावरून व्हाटसअॅप ग्रुप अॅडमिन, त्याचे सहकारी अशा पाच जणांविरुद्ध दि. ३ एप्रिल रोजी गुन्हा दाखल करण्यात आला. पुढील तपास पोलिस निरीक्षक किसन नजन पाटील करीत आहेत.