जळगाव (प्रतिनिधी) जिल्हा सहकारी दूध संघाच्या निवडणुकीत सोमवारी पालकमंत्री गुलाबराव पाटील, दूध संघाच्या अध्यक्षा मंदाकिनी खडसे, माजी मंत्री डाॅ. सतीश पाटील, माजी आमदार स्मिता वाघ यांच्यासह एकूण २० उमेदवारी अर्ज दाखल झाले आहे.
कोणी कुठून भरला अर्ज
जळगाव जिल्हा दूध संघासाठी सोमवारी पालकमंत्री गुलाबराव पाटील यांनी जळगाव तालुक्यातून आपला उमेदवारी अर्ज दाखल केला आहे. त्यांचा ठराव वडली येथून झाला आहे. त्यांच्यासह दूध संघाच्या माजी चेअरमन मंदाकिनी खडसे यांनी मुक्ताईनगर तालुक्यातून, माजी आमदार डॉ. सतीश पाटील यांनी पारोळा तालुक्यातीतून, माजी आमदार स्मिता वाघ यांनी अमळनेर तालुक्यातून, भैरवी पलांडे, मनीषा पाटील यांनी महिला मतदारसंघातून अर्ज दाखल केले आहेत.
अर्ज दाखल करण्यासाठी आता दाेनच दिवस उरले
भाजपकडून ग्रामविकास मंत्री गिरीश महाजन तर राष्ट्रवादीकडून आमदार एकनाथ खडसे हे पॅनलची तयारी करीत आहेत. इच्छुक उमेदवार दाेन्ही नेत्यांच्या संपर्कात आहेत. परंतू दूध संघाच्या निवडणुकीत अद्याप उमेदवारांच्या पॅनलबाबत काेणताही निर्णय झालेला नाही. भाजप-शिंदेसेनेच्या पॅनलमध्ये सर्वपक्षीय उमेदवारांचा समावेश असेल असा दावा केला जात आहे. दुसरीकडे उमेदवारी अर्ज दाखल करण्यासाठी आता दाेनच दिवस उरले आहेत. ९ आणि १० नाेव्हेंबर राेजी उमेदवारी अर्ज दाखल करण्याची गर्दी हाेईल.
खडसेंशिवाय सर्वपक्षीय पॅनल कसे ?
भाजपचे आमदार मंगेश चव्हाण यांनी सर्वपक्षीय पॅनलसाठी तयारी दर्शवली. मात्र, त्यात माजी मंत्री एकनाथराव खडसे यांचा समावेश नसावा अशी भूमिका घेतली होती. मात्र, या भूमिकेला आता राष्ट्रवादीकडून थेट विरोध करण्यात आला आहे. सर्वपक्षीयमध्ये सर्व पक्षांना स्थान असते. त्यात कोणत्या पक्षाने कोणत्या नेत्याला संधी द्यावी हा निर्णय त्या-त्या पक्षाला असतो. त्यामुळे एकनाथराव खडसे हे राष्ट्रवादीचे जिल्ह्यातील प्रमुख असल्याने अशा प्रकारे अटी शर्थी लादून सर्वपक्षीयची चर्चा होवू शकत नाही, अशी भूमिका राष्ट्रवादीने घेतली आहे. त्यामुळे आता भाजपची भूमिका नेमकी काय ? यावर पुढील भवितव्य अवलंबून राहणार आहे.