अमळनेर (प्रतिनिधी) शहरातील विजय स्टील दुकानासमोर बटाटा कांदा विक्री करणाऱ्या महिलेच्या हातगाडीवरून 75 हजार रुपयांची रोकड अज्ञात चोरट्यांनी चोरून नेल्याची घटना शुक्रवारी 26 जुलै रोजी दुपारी 12 वाजता घडली आहे. याप्रकरणी सायंकाळी 5 वाजता अमळनेर पोलीस ठाण्यात अज्ञात चोरट्यांवर गुन्हा दाखल करण्यात आला.
मायाबाई रामसिंग बहारे )वय-65 रा. भीम नगर, अमळनेर) या वृद्ध महिला कांदा बटाटा विक्री करून आपला उदरनिर्वाह करत असतात. नेहमीप्रमाणे शुक्रवारी 26 जुलै रोजी दुपारी 12 वाजता अंमळनेर शहरातील विजय स्टील दुकानासमोर वृद्ध महिला हातगाडीवर कांदा बटाटा विक्री करत असताना त्यांच्या हातगाडीवर ठेवलेले 75 हजार रुपयांची रोकड असलेली पिशवी अज्ञात चोरट्यांनी चोरून नेली. ही बाब त्यांच्या लक्षात आल्यानंतर त्यांनी शोध घेतला, परंतु पैशांसंदर्भात कुठलीही माहिती मिळाली नाही अखेर त्यांनी सायंकाळी 5 वाजता अमळनेर पोलिसात धाव घेतली व तक्रार दिली. त्यानुसार अज्ञात चोरट्यांवर गुन्हा दाखल करण्यात आला आहे. या घटनेचा पुढील तपास पोलीस हेडकॉन्स्टेबल विनोद सोनवणे करीत आहे.
