एरंडोल (प्रतिनिधी) तालुक्यातील विखरण येथील १९ वर्षीय युवकाचा स्वतःच्या शेतातील शेत तळ्यात पाय घसरून पडल्यामुळे बुडून मृत्यू झाल्याची घटना काल रात्री पिंपळकोठा शिवारात घडली. विखरण येथील तेजस रवींद्र अहिरे (वय १९), असे मृत तरुणाचे नाव आहे.
तेजस रविवारी सायंकाळी ७ वाजेच्या सुमारास त्यांच्या पिंपळकोठा शिवारातील शेतात गेला होता. शेतातील शेततळ्याजवळ पाय घसरल्यामुळे त्याचा पाण्यात बुडून मृत्यू झाला. मृत तेजस अहिरे यांचा आतेभाऊ गुलाब निंबा सोनवणे यांना माहिती मिळताच त्यांनी सुनील सोनवणे, वसंत अहिरे, सुनील अहिरे, नाना पाटील, आनंद शिंदे यांच्यासह शेत गाठले.
ग्रामस्थांच्या मदतीने तेजसला शेततळ्यातून बाहेर काढून ग्रामीण रूग्णालयात दाखल करण्यात आले. परंतू डॉक्टरांनी त्यास मृत घोषीत केले. मृत तेजसच्या पश्चात आई, वडील व बहिण असा परिवार आहे. या प्रकरणी गुलाब सोनवणेंच्या खबरीवरून एरंडोल पोलिसांत अकस्मात नोंद झाली आहे. घटनेची माहिती समजताच परिसरातील शेतकऱ्यांनी घटनास्थळी एकच गर्दी केली होती.
