जळगाव (प्रतिनिधी) – डॉ. बाबासाहेब आंबेडकर सार्वजनिक जयंती उत्सव समिती २०२६ चे अध्यक्षपद का दिले नाही, या कारणावरुन पोलिसांच्या रेकॉर्डवरील सराईत गुन्हेगाराच्या टोळीने सामाजिक कार्यकर्ते मुकुंद सपकाळे (वय ६४, रा. संभाजीनगर) यांच्यासोबत वाद घातला. त्यानंतर ते घरी जात असतांना रस्त्यात त्यांचे वाहन अडवून त्यांच्या वाहनावर दगडांनी हल्ला करीत मारहाण केली. ही घटना दि. ११ एप्रिल रोजी दुपारी दीड वाजेच्या सुमारास रिंगरोडवरील रामचंद्र हॉस्पिटलसमोर घडली. याप्रकरणी जिल्हापेठ पोलिसात गुन्हा दाखल करण्यात आला आहे.
संभाजीनगरात राहणारे सामाजिक कार्यकर्ते मुकुंद सपकाळे यांना मार्च २०२६ च्या पहिल्या आठवड्यात त्यांच्या ओळखीचा विशाल राजू अहिरे (रा. रामेश्वर कॉलनी) हा भेटण्यासाठी आला होता. त्याने डॉ. बाबासाहेब आंबेडकर सार्वजनिक जयंती उत्सव समिती २०२६ च्या अध्यक्षपद मला मिळावे असे म्हणाला होता. त्यावेळी मुकुंद सपकाळे यांनी त्याला तू गुन्हेगार असून तू हद्दपार देखील झाला आहे, त्यामुळे तुला अध्यक्षपद देणे चुकीचे ठरेल असे म्हणाले. त्यावेळी अहिरे हा रागात निघून जात असतांना त्याने तुला पाहून घेईल अशी मुकुंद सपकाळे यांना धमकी दिली होती. शनिवार दि. ११ एप्रिल रोजी मुकुंद सपकाळे हे दुपारी १ वाजेच्या सुमारास (एमएच १९, ईएस ००१४) क्रमांकाच्या कारने नवीन बी. जे. मार्केटमध्ये डॉ. बाबासाहेब आंबेडकर सार्वजनिक उत्सव समितीचे बॅनर घेण्याकरीता गेले होते. यावेळी त्यांचे मित्र दादाराव शिरसाठ, प्रतिलाल पवार व चालक विजय करंदीकर हे सोबत होते.
बॅनर घेण्यासाठी गेल्यानंतर झाला वाद बॅनर घेण्याकरीता सपकाळे हे एकटेच गेले असतांना, बॅनरच्या दुकानाजवळ विशाल अहिरे हा पाच ते सहा जणांसोबत उभा होता. त्याने सपकाळे यांच्याकडे पाहत अध्यक्ष पद का दिले नाही? आता बॅनर घेण्यास आला काय असे म्हणत शिवीगाळ केली. तसेच एवढ्या दिवसानंतर आज एकटा भेटला तुला पाहतो असे म्हणत दमदाटी देखील केली.
