मुक्ताईनगर (प्रतिनिधी) मुक्ताईनगर पोलीस ठाण्याच्या हद्दीतील बऱ्हाणपूर चौफुलीजवळ गुटख्याने भरलेला कंटेनर पकडला आहे. यामध्ये कंटेनर व गुटख्यासह १ कोटी ६ लाख १७ हजार ८०० रुपयांचा मुद्देमाल जप्त करण्यात आला आहे. याप्रकरणी शनिवारी २० जुलै रोजी सकाळी १० वाजता मुक्ताईनगर पोलीस ठाण्यात गुन्हा दाखल करण्यात आला आहे. ही कारवाई नाशिक येथील विशेष पोलीस महानिरीक्षक यांच्या पथकाने केली आहे.
मुक्ताईनगर पोलीस ठाण्याच्या हद्दीतील बुऱ्हानपूर चौफुली जवळून कंटेनरमधून अवैधपणे गुटख्याचे वाहतूक होत असल्याची गोपनीय माहिती नाशिक येथील विशेष पोलीस महानिरीक्षकांच्या पथकाला मिळाली. त्यानुसार पथकाने शनिवारी २० जुलै रोजी पहाटे ५ वाजता कारवाई करत कंटेनर क्रमांक (एचआर ५५ एक्यू ३८७३) हा पकडला. त्यामध्ये चौकशी केली असता यात मोठ्या प्रमाणावर गुटखा व पानमसाला मिळून आला. दरम्यान कंटेनर चालक लियाकत अली इस्लाम खान रा.मचरोली जि. मेवात राज्य हरियाणा याच्यावर कारवाई करत कंटेनरसह एकूण १ कोटी ६ लाख १७ हजार ८०० रुपयांचा मुद्देमाल जप्त केला आहे. याप्रकरणी मुक्ताईनगर पोलीस ठाण्यात कंटेनर चालक लियाकत अली इस्लाम खान, सतीश शर्मा रा. दिल्ली, त्यागी (पूर्ण नाव माहित नाही) रा.जयपूर, मुबारक (पूर्ण नाव माहित नाही) रा. दिल्ली, आणि कंपनी मालक नीलू पंजाबी उर्फ निशु राहणार भिवाडी राज्य राजस्थान यांच्या विरोधात भारतीय न्याय संहिता १२३, २७४, २७५,३५ (५) प्रमाणे गुन्हा दाखल करण्यात आला आहे.
ही कारवाई विशेष पोलीस महानिरीक्षक दत्तात्रय कराड यांच्या मार्गदर्शनाखाली पोलीस उपनिरीक्षक अरुण भिसे, पोलीस कॉन्स्टेबल तुषार पाटील, विक्रांत मांगडे, विजय बिलगे, प्रमोद मंडलिक आणि सुरेश डोंगरे यांनी केली आहे.
