जळगाव (प्रतिनिधी) उपसा सिंचन योजना लवकरात लवकर पूर्ण करा, असा फोन करणाऱ्या बोदवड येथील एकाला बुलढाण्याचे शिंदे गटाचे आमदार संजय गायकवाड यांनी शिवीगाळ केल्याचा धक्कादायक प्रकार समोर आला आहे. या संभाषणाची एक क्लीप सोशल मीडियावर व्हायरल झाली आहे.
बोदवड येथील अनिल गंगतिरे नामक व्यक्तीने आमदार संजय गायकवाड यांना फोन केला होता. यावेळी त्याने गायकवाड यांना बोदवड परिसर उपसा सिंचन योजना कधी पूर्ण होणार?, असा आशयाचा सवाल विचारला. यावर संजय गायकवाड चांगलेच वैतागले. बोदवड उपसा सिंचन योजनेसाठी उच्चस्तरीय समितीची बैठक झाली आहे. त्यासाठी मी केंद्र आणि राज्य सरकारकडून ११०० कोटींचा निधीही मंजूर करुन घेतला आहे. आता फक्त निविदा निघण्याची प्रक्रिया सुरु आहे. या मार्च महिन्यात योजनेचे काम सुरुही होईल. त्यामुळे तुम्ही आता काहीतरी नौटंकी करुन राजकारण करु नका, असे गायकवाड यांनी गंगतिरे यांना सुनावले. यावर संबंधित नागरिकही आमदार गायकवाड यांच्याशी हुज्जत घालू लागला. त्यामुळे संजय गायकवाड यांच्या संतापाचा पारा आणखीनच चढला आणि त्यांनी या नागरिकाला चक्क अश्लिल शिवीगाळ केली.
आमदार व संबंधित नागरिकांच्या संभाषणाची ऑडिओ क्लिप सोशल मीडियावर चांगलीच व्हायरल झाली आहे. बोदवड परिसर उपसा सिंचन योजना लवकरात लवकर पूर्ण व्हावी, यासाठी बोदवड तालुक्यातील शेतकरी बोदवड ते मंत्रालय ४७४ किलोमीटर पायी गेल्यानंतर आझाद मैदानावरून (मुंबई) भोले महाकाल फाउंडेशन अध्यक्ष अनिल गंगतिरे यांनी बुलढाण्याचे आमदार संजय गायकवाड यांना फोन लावल्यावर त्यांनी शेतकऱ्यांना चक्क शिवीगाळ करून त्यांचा अपमान केला आणि ही नौटंकी की बंद करा असे सांगितले. यावरुन आता वाद निर्माण झाला आहे. दरम्यान, तब्बल अर्धा तास बोलल्यावर फक्त दोन मिनिटांची क्लिप का दाखवली जात आहे?, असा प्रश्न संजय गायकवाड यांनी उपस्थित केला आहे.
