पुणे (वृत्तसंस्था) जावई म्हणून हाच मुलगा मला पाहिजे, असे म्हणत अल्पवयीन मुलीच्या आईने मुलीसह संभाव्य जावयाला घेऊन गळा चिरून पतीची हत्या केल्याचा खळबळजनक प्रकार उघडकीस आला आहे. जॉन्सन केजिटन लोबो (वय ४९, रा. वडगाव शेरी, पुणे) असे मृताचे नाव आहे.
२३० सीसीटीव्ही कॅमेऱ्यांचे सीसीटीव्ही फुटेज तपासले
मृतदेह पूर्णतः जळालेला असल्याने त्याची ओळख पटवणे अवघड होते. पोलिसांनी परिसरातील २३० सीसीटीव्ही कॅमेऱ्यांचे सीसीटीव्ही फुटेज तपासले. तपासत एका संशयित मोटारीचा शोध घेतला असता मृत व्यक्तीची पत्नी व एका तरुणासह अल्पवयीन मुलीचा या प्रकरणात सहभाग असल्याचे निष्पन्न झाले. या तिघांनी जॉन्सन लोबो यांचा खून केल्यानंतर मृतदेह एक दिवस घरातच ठेवून नंतर सणसवाडी (ता. शिरूर) येथे पुणे-नगर महामार्गावर जाळून टाकला होता.
वेगवेळ्या क्राईम वेबसिरीज पाहून रचला कट !
आरोपी अॅग्नेलचे जॉन्सनच्या अल्पवयीन मुलीसोबत प्रेमसंबंध होते. त्यांच्या प्रेमसंबंधाला आरोपी मुलीची आई सॅन्ड्राची संमती होती. त्यामुळे जॉन्सनचा कायमचा काटा काढण्याच्या उद्देशाने आरोपी अॅग्नेल आणि सॅन्ड्राने वेगवेळ्या क्राईम वेबसिरीज पाहून कट रचला. संगनमत करून 30 मे रोजी आरोपींनी रात्रीच्या वेळी जॉन्सनच्या डोक्यात वरवंट्याने मारून आणि मानेवर चाकूने वार करीत खून केला. पुरावा नष्ट करण्यासाठी आरोपींनी 31 मे रोजी रात्रीच्या सुमारास मृतदेह मोटारीतून सणसवाडी परिसरातील नाल्यात टाकून त्याच्यावर पेट्रोल टाकून पेटवून दिले.
प्रेमसंबंधाला विरोध केल्यामुळे खून !
आरोपी अॅग्नेल कसबे याचे मयत जॉन्सन लोबो हीची मुलगी विधीसंघर्षीत बालिका हिचेसोबत प्रेमसंबंध होते, विधीसंघर्षात बालिका ही आरोपी सॅन्ड्रा लोबो व मयत यांची मुलगी आहे. त्यांच्या या प्रेमसंबंधाला आरोपी आई सॅन्ड्रा लोबो हिची संमती होती, परंतु मयत याचा विरोध होता. त्यामुळे आरोपी सॅन्ड्रा लोबो व मयत जॉन्सन लोबो यांचेत वाद होत होते.
खून केल्यानंतर मृतदेह घरात ठेवला !
वडिलांना कायमचा दूर करणेच्या उद्देशाने वेगवेगळ्या काईम वेब सिरीज पाहून कट रचला आणि आरोपींनी मयत जॉन्सन कॅजीटन लोबो याचा 30 मे रोजी रात्रीचे वेळी त्याच्या घरातच डोक्यात वरवंटयाने मारून तसेच मानेवर चाकूने वार करून खून केला. त्यानंतर मयत प्रेत घरातच ठेवले.
मयताचा फोन चालू ठेवून रोज व्हॉटसअप स्टेटस ठेवणे होते सुरू !
मृतदेहाची विल्हेवाट लावून पुरावा नष्ट करण्यासाठी 31 मे रोजी रात्री मयतास वॅगनआर कारमध्ये टाकून सणसवाडी जवळील एचपी पेट्रोल पंपाचे अलीकडे पुणे से अहमदनगर हायवे रोडलगत कार थांबवून मयतास हायवे रोडलगतचे नाल्यात टाकून त्याचेवर पेट्रोल टाकून त्यास पेटवून दिल्याचे सांगितले. पत्नीने हत्या केल्यानंतर नातेवाईकांना व शेजारी यांना समजु नये. तसेच पोलिसांची दिशाभूल व्हावी म्हणून त्यांनी मयताचा फोन चालूच ठेवून त्यावरून रोज व्हॉटसअप स्टेटस ठेवणे सुरू केले होते.
पोलिसांनी पत्रकार परिषद घेत दिली माहिती !
शिक्रापूर पोलिसांसह स्थानिक गुन्हे शाखेने तब्बल २३० सीसीटीव्हीचे फुटेज तपासून दोघांना अटक केली असून, अल्पवयीन मुलीला ताब्यात घेतले आहे. ही माहिती जिल्हा पोलिस अधीक्षक डॉ. अंकित गोयल, पोलिस निरीक्षक प्रमोद क्षीरसागर, स्थानिक गुन्हे शाखेचे पोलिस निरीक्षक अविनाश शिळमकर यांनी पत्रकार परिषदेत दिली. पोलिसांनी दिलेल्या माहिती नुसार १ जून रोजी अज्ञात व्यक्तीचा खून करून सणसवाडी हद्दीत पुणे-नगर महामार्गावरील जाळून टाकून देण्यात आला होता.
