एरंडोल (प्रतिनिधी) येथील बालाजी ऑइल मिलचे संचालक अनिल गणपती काबरा यांच्याकडे आठ लाखांची खंडणी मागण्यासाठी आलेल्या आठ जणांच्या टोळीला पोलिसांनी छापा टाकून पकडले आहे. त्यांच्याकडून एक लाख रुपये रोख, आठ मोबाइल दोन दुचाकी, एक कार असा एकूण दहा लाख रुपये किमतीचा मुद्देमाल जप्त करण्यात आला आहे.
संशयित आरोपींमध्ये दोन मुली अल्पवयीन असल्याने त्यांची बालसुधारगृहात रवानगी करण्यात आली आहे. इतर संशयित आरोपींमध्ये शशिकांत कैलास सोनवणे (३९, द्वारकानगर, भुसावळ), सिद्धार्थ सुनील सोनवणे (२०, रा.झेड.टी.एस. रोड, भुसावळ), पत्रकार मिलिंद प्रकाश बोदडे (३६), आकाश सुरेश बोदडे (२२, दोघे रा. तळणी, बुलढाणा), गजानन आनंदा बोदडे (३२), साक्षी राजू तायडे (३२, दोघे रा. कुलकर्णी प्लॉट, भुसावळ) यांचा समावेश आहे. काबरा यांना मिलबाबत तक्रार करण्याची धमकी देत त्यांच्याकडून सात ते आठ लाख रुपये खंडणी मागितली होती.
या टोळीतील तीन जण सोमवारी ऑइल मिलमध्ये खंडणीची रक्कम घेण्यासाठी येणार होते. याबाबत एरंडोल पोलिस स्टेशनला गुन्हा दाखल करण्यात आला होता. त्यामुळे तिथे पोलिसांना सापळा लावलेला होता. टोळीतील दोन महिलांसह तीनजण ऑइल मिलमध्ये आले व चार जण बाहेर थांबले. अनिल काबरा यांच्याकडून महिलेने एक लाख रुपयांची खंडणी घेताच तिला पोलिसांनी ताब्यात घेतले. चाहूल लागल्याने बाहेर उभ्या असलेल्या चारही जणांनी दुचाकीवर जळगावकडे पळून जाण्याचा प्रयत्न केला. पोलिसांनी त्यांना पाठलाग करून ताब्यात घेतले. पोलिस निरीक्षक ज्ञानेश्वर जाधव, सपोनि गणेश अहिरे, उपनिरीक्षक शरद बागल, हे.कॉ. अनिल पाटील, पोना. मिलिंद कुमावत, संदीप पाटील, जुबेर खाटीक, ममता तडवी, होमगार्ड दिनेश पाटील यांच्या पथकाने ही कामगिरी बजावली.
