बोदवड (प्रतिनिधी) शहरातील एका डॉक्टरला बदनामीकारक बातमी छापुन बदनामी करण्याची धमकी देत पाच लाखांची खंडणी मागितल्या प्रकरणी तिघांविरुद्ध गुन्हा दाखल करण्यात आला आहे.
या संदर्भात अधिक असे की, शहरातील डॉ. यशपाल समाधान बडगुजर (वय ४२) यांचे समछाया नावाचे हॉस्पिटल आहे. शहरातील सलीमशहा बशीरशहा यांनी डॉ. बडगुजर यांच्याकडे मुळव्याधवर उपचार घेतले होते. परंतू चुकीच्या पद्धतीने उपचार केल्यामुळे कॅन्सर झाला, असा आरोप करत सलीमशहा याने डॉ. बडगुजर यांच्याकडे ५ लाखांची खंडणी मागितली. तसेच खंडणी न दिल्यास पेपरमध्ये बदनामीकारक बातमी छापून बदनामी करण्याची धमकी दिली.
तसेच नंदु उर्फ नंदलाल श्याम पटे, अशोक भवरलाल झाबक (सर्व.रा. बोदवड) यांनी त्यांच्या ‘थर्ड आय’ या वृत्तपत्रामध्ये जाहीरात देण्यासाठी तसेच सलीमशहासाठी पैशांची मागणी करुन खंडणी मागीतली. खंडणी न दिल्यास डॉ. बडगुजर यांना पेपरमध्ये बदनामी कारक बातमी छापून बदनामी करण्याची धमकी दिली. त्यावर डॉ. बडगुजर यांनी खंडणी देण्यास नकार दिला. त्यामुळे पटे आणि झाबक यांनी त्यांच्या ‘थर्ड आय’ या वृत्तपत्रामध्ये डॉक्टरांची बदनामीकारक वृत्त छापून, सदर पेपरचे कात्रण बोदवड शहरातील वर्दळीच्या ठिकाणी चिपकवून बदनामी केली, अशा आशयाची तक्रार डॉ. यशपाल बडगुजर यांनी पोलिसात केली आहे. त्यानुसार तिघां संशयित आरोपींविरुद्ध खंडणीचा गुन्हा दाखल करण्यात आला असून पुढील तपास स.फौ. सुधाकर शेजोळे हे करीत आहेत.
दरम्यान, या प्रकरणाबाबत पत्रकार नंदलाल पठे यांच्याशी संपर्क केला असता त्यांनी सांगितले की, माझ्याकडे सलीम शहा बशीर शहा हे आले होते. त्यांनी जी माहिती दिली त्या आधारे मी साप्ताहिकात बातमी प्रसिद्ध केली होती. जाहिरात ही साप्ताहिक चालवण्यासाठी आम्ही सर्वांनाच मागत असतो. त्यास खडणी म्हणणे चुकीचे होईल. दरम्यान, सलीम शहा बशीर शहा यानेसुद्धा चुकीची शस्त्रक्रिया करून माझ्या शरीराचा सत्यानाश केल्याबद्दल डॉक्टर यशपाल बडगुजर यांच्यावर गुन्हा दाखल करावा असा तक्रार अर्ज बोदवड पोलीस ठाण्यात दिला आहे.
