पारोळा (प्रतिनिधी) शिक्षक असलेल्या मुलाने वडिलांना शिवीगाळ करून धमकावत जीवे ठार मारण्याची धमकी दिल्याची तक्रार खुद्द शिक्षकाच्या पित्यानेच पोलिसांत दिली आहे. या प्रकरणी शिक्षकासह अन्य दोघांविरुद्ध गुन्हा दाखल करण्यात आला आहे.
दयाराम मोतीराम पाटील (विद्यानगर, पारोळा) हे १९९६पासून योगेश्वर माध्यमिक विद्यालय, सावखडे तुर्क, ता. पारोळा या संस्थेचे संस्थापक अध्यक्ष आहेत. १७ जून रोजी ते योगेश्वर माध्यमिक विद्यालयात कामानिमित्त गेले होते. त्यावेळी मुलगा अशोक पाटील, चंद्रकांत साहेबराव पाटील, महेंद्र साहेबराव पाटील हे तिघे जण त्या शाळेच्या आवारात आले.
यातील चंद्रकांत पाटील यांनी दयाराम पाटील यांना शिवीगाळ केली. शिवीगाळ करू नको, अशी सूचना दयाराम पाटील यांनी केल्यावर चंद्रकांत पाटील यांना राग आला. त्यावेळी त्यांनी लाकडी फळी घेऊन दयाराम पाटील यांच्या अंगावर धावून आले. शाळेतील शिक्षकांनी हे भांडण सोडवले.
भांडण सोडविल्यानंतर दयाराम पाटील त्यांच्या वाहनाने घरी येण्यासाठी निघाले असता, मुलगा अशोक पाटील याने वाहनाची चावी हिसकावून घेत, बळजबरीने वाहन ताब्यात घेतले. त्या वाहनात संस्थेची व वाहनांची कागदपत्रे होती.
दि. २० जुलै रोजी सायंकाळी ६ वाजता दयाराम पाटील हे निवासस्थानी असताना मुलगा अशोक हा घरी आला व दयाराम पाटील यांना शिवीगाळ करून, जीवे ठार मारण्याची धमकी देऊन गेल्याची तक्रार त्यांनी पोलिसात दिली. त्यावरून अशोक पाटील, चंद्रकांत पाटील, महेंद्र पाटील यांच्याविरुद्ध गुन्हा दाखल झाला आहे.
