बुलडाणा (वृत्तसंस्था) स्टेअरिंग जाम झाल्याने भरधाव बोलेरो पुलाखाली कोसळली. या अपघातात ८५ वर्षीय वृद्ध महिलेच्या डोक्याला जबर मार लागल्याने घटनास्थळीच मृत्यू झाला तर पाच जण जखमी झाले. त्यापैकी दोघांची प्रकृती चिंताजनक आहे. ही घटना शुक्रवारी सकाळी साडेदहा वाजेच्या सुमारास निमखेडी फाट्याजवळ घडली.
मध्य प्रदेशातील माहोद तालुक्यातील काही नातेवाइक एम एच १९ / ए पी / ३९२३ या क्रमांकाच्या बोलेरो वाहनाने खामगाव तालुक्यातील नातेवाइकाच्या अंत्यविधीसाठी जात होते. निमखेडी फाट्या समोरील वन विभागाच्या चौकी समोरील पुलावर वाहनाचे अचानक स्टेअरिंग जाम झाल्याने चालकाचे वाहनावरील नियंत्रण सुटले. त्यामुळे वाहन पुलावरून खाली नदीत कोसळले. या अपघातात बोलेरो वाहनाचा अक्षरशा चुराडा झाला आहे.
या अपघातात डोक्याला जबर मार लागल्याने कलावतीबाई श्रीरंग टेकाळे (वय ८५ रा. कदमापूर ता. खामगाव) या वृध्द महिलेचा जागीच मृत्यू झाला आहे. तर संजय पाटील (वय ५४), शारदा पाटील (वय ५०), विलास पाटील (वय ३३) हे किरकोळ जखमी झाले असून राजेंद्र पाटील (वय ५६) व सरला पाटील (वय ३५ दोन्ही रा. माहोद ता.जि. बऱ्हाणपूर) हे दोघे गंभीर जखमी झाले आहेत. अपघातातील सर्व जखमींना पुढील उपचारार्थ खामगाव येथील सामान्य रुग्णालयात हलवण्यात आले असून पुढील तपास ठाणेदार दिनेश झांबरे यांच्या मार्गदर्शनाखाली पोलिस नाईक उमेश शेगोकार हे करत आहेत.
