लातूर (वृत्तसंस्था) जिल्ह्यातील अहमदपूर तालुक्यातील राळगा येथील मामाकडून जेवण करून घरी परतणाऱ्या भावडांच्या दुचाकीला झालेल्या भीषण अपघातात एकाचा मृत्यू तर दुसरा भाऊ गंभीर जखमी झाला आहे. गणेश कचरू सुरनर (२६) असे मृत तरुणाचे नाव आहे. तर गोविंद कचरू सुरनर ( २३, दोघेही रा. तावजेवाडी, पालम) हा गंभीर जखमी झाला आहे.
गणेश व गोविंद हे दोघे मंगळवारी अहमदपूर तालुक्यातील राळा येथील मामाच्या घरी गेले होते. तेथून परत येत असताना पावसामुळे समोर उभा असलेला टिप्पर न दिसल्याने दुचाकी टिप्परवर धडकली. अपघातानंतर गोविंद शुद्धीवर आल्यानंतर त्याने मामाला फोन करून घटनेची माहिती दिली. बेशुद्धावस्थेत गणेशला लातूर येथे घेऊन जात असताना वाटेतच त्याची प्राणज्योत मालवली. गणेश याच्या पश्चात जखमी भाऊ, पत्नी, दोन मुली, आई असा परिवार आहे. तर दुसरा भाऊ गोविंद हा गंभीर जखमी झाला आहे. दरम्यान, अपघाताची माहिती मिळताच कुटुंबीयांनी एकच हंबरडा फोडला.
