भुसावळ ( प्रतिनिधी ) – भुसावळ शहरात बुधवारी मोठी खळबळ उडाली, जेव्हा ओडिशा पोलिसांनी खून आणि तब्बल ५ कोटी रुपयांच्या खंडणी प्रकरणातील फरार संशयित आरोपीला थेट भुसावळमधून ताब्यात घेतले. स्थानिक पोलिसांच्या मदतीने करण्यात आलेल्या या कारवाईमुळे शहरात दिवसभर चर्चांना उधाण आले होते.
ताब्यात घेण्यात आलेल्या संशयिताची ओळख नितीन साहेबराव नाटकर (वय ३६, रा. जुना सातारा, सुतार गल्ली, भुसावळ) अशी असून, पुढील तपासासाठी ओडिशा पोलिस त्याला आपल्या ताब्यात घेऊन रवाना झाले आहेत.
मिळालेल्या माहितीनुसार, बेरहानपूर पोलीस ठाण्यात १६ जानेवारी २०२६ रोजी खून आणि ५ कोटी रुपयांच्या खंडणीचा गंभीर गुन्हा दाखल करण्यात आला होता. या प्रकरणातील संशयित आरोपी भुसावळमध्ये लपल्याची गुप्त माहिती ओडिशा पोलिसांना मिळाली होती.
या माहितीच्या आधारे बेरहामपूर पोलीस ठाण्याचे निरीक्षक बाबा शंकर सराफ यांच्या नेतृत्वाखाली विशेष पथक भुसावळमध्ये दाखल झाले. ओडिशा पोलिसांनी भुसावळ शहर पोलीस ठाण्याचे निरीक्षक उद्धव डमाळे यांची मदत घेत संयुक्त कारवाई करत २० मे रोजी सुतार गल्ली परिसरातून संशयिताला ताब्यात घेतले.राजकीय कनेक्शनच्या चर्चा कारवाईदरम्यान शहरातील एका अपार्टमेंटवर छापा टाकण्यात आल्याची माहिती समोर आली आहे. संबंधित अपार्टमेंट मालक हा शहरातील एका नगरसेवक कुटुंबाशी संबंधित असल्याची चर्चा रंगू लागल्याने या प्रकरणाला आता राजकीय रंग चढू लागला आहे.
स्थानिक स्तरावर आरोपीला आश्रय देण्यात आला होता का ? त्याला संरक्षण कोण देत होते ? याबाबत शहरात विविध चर्चाना उधाण आले आहे.
बनावट कागदपत्रांचाही संशय
सूत्रांच्या माहितीनुसार, संशयितासाठी स्थानिक स्तरावर कथित बनावट कागदपत्रे तयार करून देण्यात आल्याचा संशय व्यक्त केला जात आहे. पोलिसांना आरोपीशी संबंधित काही महत्त्वाची कागदपत्रे मिळाल्याचीही चर्चा आहे जर या प्रकरणात बनावट कागदपत्रांच वापर झाल्याचे स्पष्ट झाले, तर आरोपीस त्याला मदत करणाऱ्यांवरही मोट कारवाई होण्याची शक्यता व्यक्त केल्ल जात आहे.
सुरत कनेक्शन तपासाच्या रडारवर
चौकशीत संशयित काही काळ सुरत येथे वास्तव्यास असल्याची माहिती समोर आली आहे. त्यामुळे ओडिशा पोलिसांचे पथक आता सुरतकडे रवाना झाल्याचे समजते. या प्रकरणामागे मोठे नेटवर्क सक्रिय होते का, याचाही तपास सुरू आहे.
