अमळनेर (प्रतिनिधी) अल्पवयीन मुलीशी जबरदस्तीने प्रेमसबंध ठेवून तिच्यावर अत्याचार केल्याची धक्कादायक घटना उघडकीस आली आहे. याप्रकरणी अमळनेर पोलीस स्थानकात दोघांविरुद्ध पोक्सो कायद्यानुसार गुन्हा दाखल करण्यात आला आहे.
यासंदर्भात अधिक असे की, गांधलीपुरा येथील एका साडेसतरा वर्षीय मुलीचा विवाह ठरला असून ती अठरा वर्षाची असताना तिचा विवाह करण्यात येणार होता. मात्र १८ मे रोजी ती अचानक रडू लागल्याने आईवडिलांनी विचारपूस केल्यावर तिने सांगितले की मेहतर कॉलनीतील कुणाल देवा घोगले हा तुम्ही घरी नसताना माझ्यावर जबरदस्ती प्रेम करायचा आणि मला तुझ्याशी लग्न करायचे आहे, असे म्हणत त्याचा चुलत भाऊ रवी ऊर्फ राघूभाई राजू घोगले याला बरोबर घेऊन तुझ्या वडिलांना मारून टाकू अशी धमकी देत होता. तसेच तो तीन-चार वेळेस आला आणि त्याने घरासमोरील पडक्या घरात अत्याचार केला. त्यावेळी रवी घोगले याला घराबाहेर ठेवायचा व गल्लीतील लोकांनादेखील त्यावेळी मुलीच्या आईवडिलांना सांगितले तर तुमचा मुडदा पाडू अशी धमकी द्यायचा. लग्न ठरल्याचे त्याला कळल्यावर मुलीचा शाळा सोडल्याचा दाखला तो जबरदस्तीने घेऊन गेला, अशी या मुलीची तक्रार आहे. याप्रकरणी मुलीच्या वडिलांच्या तक्रारीवरून पोक्सो कायद्यानुसार गुन्हा दाखल करण्यात आला आहे. तपास पोलीस उपनिरीक्षक अनिल भुसारे करीत आहेत.
