भोकरदन : दिवाळी सणासाठी दुचाकीने बहिणीला माहेरी आणण्यासाठी निघालेल्या भावाचा भोकरदन-सिल्लोड रोडवर इब्राहिमपूर फाट्याजवळ अपघाती मृत्यू झाल्याची दुर्दैवी घटना घडली आहे. एकनाथ शिवाजी आहेर (वय ३०, रा. पिंपळगाव रेणुकाई), असे अपघातात मृत झालेल्या भावाचे नाव आहे.
एकनाथ आहेर हे आपल्या दुचाकीने शनिवारी सायंकाळी सात वाजेच्या सुमारास पिंपळगाव रेणुकाई येथून सिल्लोडकडे जात होते. यावेळी सिल्लोडकडून भोकरदनकडे येणाऱ्या कारने त्यांच्या दुचाकीला जोरदार धडक दिली. यात गंभीर जखमी होऊन एकनाथ आहेर यांचा घटनास्थळीच मृत्यू झाला. पोलिसांनी जखमी आहेर यांना भोकरदन येथील ग्रामीण रुग्णालयात आणले असता डॉक्टरांनी त्यांना मृत घोषित केले. या प्रकरणी भोकरदन पोलिस ठाण्यात आकस्मिक मृत्यूची नोंद घेण्यात आली आहे.
