छत्रपती संभाजीनगर (वृत्तसंस्था) शासकीय वैद्यकीय महाविद्यालयातील सार्वजनिक बांधकाम विभागाच्या कनिष्ठ लिपिकास लाचलुचपत विभागाच्या पथकाने सोमवारी पाच हजाराची लाच स्वीकारतांना रंगेहाथ अटक केली आहे. रघुनाथ तुकाराम केदारे (४५, रा. पळशी खुर्द, ता. कन्नड, ह.मु. पवननगर) असे संशयित आरोपीचे नाव आहे.
तक्रारदारांची इन्फन्ट जिजस बहुउद्देशीय सेवाभावी संस्था आहे. या संस्थेला निविदा दाखल करण्यासाठी केदारेने अनुभव प्रमाणपत्र दिले होते. त्यानंतर त्याने तक्रारदाराशी संपर्क साधून अनुभव प्रमाणपत्र दिल्याचा मोबदला म्हणून १५ हजार रुपये मागितले. तडजोडीअंती पाच हजार देण्याचे ठरले, पण तक्रारदाराला लाच देण्याची इच्छा नसल्याने त्याने एसीबीकडे तक्रार दिली. त्यानुसार पथकाने घाटी परिसरातील सार्वजनिक बांधकाम विभागाच्या कार्यालयात सापळा रचून पाच हजारांची लाच घेणाऱ्या केदारेला रंगेहाथ पकडले. या प्रकरणी बेगमपुरा पोलिस ठाण्यात गुन्हा दाखल करण्यात आला आहे.
