लातूर (वृत्तसंस्था) दिवसभर रंगकाम करून तिघं मित्र घरी परत यायला निघाले होते. परंतू रस्त्यातच भरधाव वेगातील अज्ञात वाहनाने त्यांच्या दुचाकीला उडविले. या अपघातात दोन मित्र ठार झाल्याची दुर्दैवी घटना शनिवारी रात्री शिरूर ताजबंद परिसरात (ता. अहमदपूर) येथे घडली.
दत्ता बब्रुवान गुडेवार (२१, रा. हंडरगुळी) व अमित देवानंद गायकवाड (२४, रा. हाळी) असे दोघा मयत तरुणांची नावे आहेत. उदगीर तालुक्यातील हाळी हंडरगुळी येथील दत्ता बब्रुवान गुडेवार, अमित देवानंद गायकवाड, आणि त्यांचा आणखी एक मित्र अहमदपूर येथे रंगकामासाठी गेले होते. तिघंही मित्र काम आटोपून शनिवारी रात्री अहमदपूरहून घरी परत यायला दुचाकीवरून निघाले होते. परंतू शिरूर ताजबंदच्या पुढे अचानक भरधाव वेगातील अज्ञात वाहनाने त्यांच्या दुचाकीला जोरात धडक दिली. या अपघातात दत्ता गुडेवार याचा जागीच मृत्य झाला. तर अमित देवानंद गायकवाड याचा उपचारादरम्यान लातुरात मध्यरात्री मृत्यू झाला. तर तिसरा मित्र जखमी झाला आहे.
