पंचवटी (वृत्तसंस्था) पैशांच्या वादातून टोळीतील पाच ते सहा साथीदारांनी सराईत गुन्हेगार संदेश चंद्रकांत काजळे (वय ३५, रा. विजयनगर, सिडको) याचे अपहरण करून निर्घृण हत्या केली. त्यानंतर त्याचा मृतदेह मोखाडा भागात नेऊन जाळून टाकल्याची खळबळजनक घटना उघडकीस आली आहे. स्वप्निल दिनेश उन्हवणे (वय २३, रा. ओम साई निवास, निमाणी बसस्टॉपसमोर, राजवाडा, पंचवटी) असे अटक करण्यात आलेल्या संशयिताचे नाव आहे.
शुक्रवारी (दि. ९) मध्यरात्री १२ वाजेच्या सुमारास संदेश काजळे निमाणी बसस्थानकासमोरील इमारतीच्या मागील पार्किंगमध्ये आला. त्याठिकाणी त्याचे संशयित मित्र स्वप्निल उन्हवणे, नितीन उर्फ पप्पू चौगुले (रा. ड्रीम कॅसलमागे, मखमलाबाद रोड), रणजित आहेर (रा. राजवाडा, पंचवटी), पवन भालेराव (रा. राजवाडा, त्र्यंबकेश्वर) व अन्य साथीदारांमध्ये आर्थिक देवाणघेवाणीतून वाद झाले. यात संशयितांनी काजळे यास मारहाण करून त्याचे कारमधून अपहरण केले. यासंदर्भात संदेशचा चुलतभाऊ प्रीतेश काजळे याने पंचवटी पोलिसांत अपहरण झाल्याची तक्रार दिली होती.
तक्रार मिळताच पोलिसांनी तात्काळ तपास सुरू केला. रविवारी (दि. ११) पहाटेच्या सुमारास मोखाडा पोलीस ठाण्याच्या हद्दीतील ताकपाडा परिसरातील निर्जन जंगलात काजळे याचा अर्धवट जळालेला मृतदेह मोखाडा पोलिसांना आढळून आला. या मृतदेहाच्या तपासात काजळे याच्या अपहरणाच्या दाखल गुन्ह्यातील माहिती व त्याचे वर्णन काजळे याच्याशी जुळत असल्याने मोखाडा पोलिसांनी नाशिक शहर पोलिसांना या प्रकरणाची माहिती दिली. त्यानुसार पंचवटी आणि गुन्हे शाखा युनिट १ च्या पथकाने समांतर तपास केला असता, संशयित उन्हवणे हा कारने त्र्यंबक भागात असल्याची माहिती मिळाली. युनिट १ चे वरिष्ठ निरीक्षक अनिल शिंदे यांच्या मार्गदर्शनाखाली पथकाने सापळा रचून त्यास अटक केली. उर्वरित फरार संशयितांचा शोध सुरू आहे.
काजळे सराईत गुन्हेगार !
संदेश काजळे याच्यावर यापूर्वी खंडणी, अवैध सावकारी, मारहाण, खुनाचा प्रयत्न, फसवणूक, दमदाटी, अॅट्रोसिटीसह अन्य गंभीर गुन्हे दाखल होते. काजळे याने काही वर्षापूर्वी दोन डीजेवादकांना मारहाण करीत सिगारेटचे चटके दिले होते. वाढदिवस सुरू असताना मद्याच्या नशेत त्याने इतर नऊ जणांसह या वादकांचा लैंगिक छळ करून मारहाण केली होती. त्यानंतर तो फरार झाला होता. काही दिवसांत ग्रामीण पोलिसांनी त्याला व त्याच्या साथीदारांना अटक केली होती.
