नवी दिल्ली (वृत्तसंस्था) दिल्लीच्या वेशीवर सुरु असलेल्या शेतकरी आंदोलनाच्या पार्श्वभूमीवर काँग्रेसच्या हंगामी अध्यक्ष सोनिया गांधी बुधवारी आपला वाढदिवस साजरा न करण्याचा निर्णय घेतला. काँग्रेस नेते गोविंद सिंह डोटासरा यांच्याकडून ही माहिती देण्यात आली.
९ डिसेंबर रोजी सोनिया गांधी यांचा जन्मदिवस आहे. बुधवारी त्या ७४ वर्षांच्या होतील. मात्र त्यांनी वाढदिवस साजरा करणार नसल्याचं सांगितलं आहे. त्याशिवाय ९ डिसेंबर रोजी शेतकरी आणि केंद्र सरकार यांच्यात सहाव्यांदा चर्चा होणार आहे. यापूर्वी पाच वेळा झालेल्या चर्चेतून कोणताही निष्कर्ष आलेला नाही. कोरोना आणि शेतकरी आंदोलन या दोन घटनांच्या पार्श्वभूमीवर सोनियाजी आपला वाढदिवस साजरा करणार नसल्याचे त्यांनी स्पष्ट केले. कृषी कायद्याविरोधात शेतकरी आंदोलन सुरू आहेत. शेतकऱ्यांच्या या आंदोलनाचा आजचा १३ वा दिवस असून आज भारत बंदची हाक देण्यात आली आहे. शेतकऱ्यांच्या या भारत बंदला काँग्रेससह २० हून अधिक पक्षांनी पाठिंबा दिला आहे. यादरम्यान काँग्रेस अध्यक्ष सोनिया गांधी यांनी आपल्या जन्मदिवसाबाबत काही घोषणा केल्या आहेत. कृषी कायद्याविरोधात सुरू असलेलं शेतकरी आंदोलन आणि कोरोना व्हायरसच्या स्थितीमुळे ९ डिसेंबर रोजी त्यांनी आपला वाढदिवस साजरा न करण्याचं सांगितलं आहे.
केंद्र सरकारच्या कृषी कायद्यांचा विरोध करण्यासाठी काँग्रेसचे कार्यकर्ते शेतकऱ्यांच्या खांद्याला खांदा लावून रस्त्यावर उतरतील, असेही त्यांनी सांगितले. त्यामुळे आता काँग्रेस आज देशभरात कृषी कायद्यांविरोधात कशाप्रकारे आंदोलन करणार, याकडे सर्वांचे लक्ष लागले आहे.
