जळगाव (प्रतिनिधी) अजित पवारांवर जीव ओवळणारा जळगावातील एक कार्यकर्ता सध्या चर्चेत आलाय. तो म्हणजे त्याच्या एका उपक्रमामुळे.. अजित पवारांचा २२ जुलै रोजी वाढदिवस येत आहे. या निमित्ताने अजित पवारांना जनतेचे आशीर्वाद मिळून उदंड आयुष्य लाभावे, ते राज्याचे मुख्यमंत्री व्हावेत, म्हणून अरविंद बंगालसिंह चितोडिया हा कार्यकर्ता चक्क ३० क्विंटल साखर लोकांना घरोघरी जाऊन वाटत आहे.
जिल्ह्यातील भुसावळ येथील रहिवासी असलेला अरविंद चितोडिया हा जळगाव जिल्हा राष्ट्रवादी काँग्रेसच्या व्हीजेएनटी सेलचा जिल्हाध्यक्ष आहे. यापूर्वी त्याने रक्तदान शिबिर, आरोग्य तपासणी शिबिरे घेतली आहेत. कोरोनामुळे गर्दी टाळण्यासाठी रक्तदान किंवा आरोग्य तपासणी शिबिरे घेण्यापेक्षा लोकांना उपयोगात येईल, असा काहीतरी वेगळा उपक्रम राबविण्याचा विचार अरविंदने केला. याच विचारातून त्याने लोकांना ३० क्विंटल साखर स्वखर्चाने वाटण्याचा निर्णय घेतला. सध्या तो आणि त्याचे सहकारी जामनेर तालुक्यातील वाघारी-बेटावद जिल्हा परिषद गटातील विविध गावांमध्ये फिरून लोकांना घरोघरी साखर वाटप करत आहेत. त्याच्या या उपक्रमाची जिल्ह्यात जोरदार चर्चा सुरू आहे.
अरविंद चितोडिया पुढे म्हणाला की, अजित पवारांना उदंड आयुष्य मिळावे, त्यांना जनतेचे आशीर्वाद मिळावे आणि ते पुढे मुख्यमंत्री व्हावेत, अशी आमची मनस्वी इच्छा आहे. त्यांना मुख्यमंत्री म्हणून पाहायचे आहे. अजित पवार राज्याचे मुख्यमंत्री झाले तर त्यांच्या हातून गोरगरिबांची सेवा घडेल, राज्याचा सर्वांगीण विकास होईल, अशा भावना अरविंद याने व्यक्त केल्या आहेत.
