जळगाव (प्रतिनिधी) महाराष्ट्र जीवन प्राधीकरण विभागाच्या जळगाव येथील कार्यालयात भरदिवसा कर्मचारी मद्य प्राशन करणाऱ्या तिघांना निलंबित करण्यात आले आहे. दरम्यान, पालकमंत्री ना. गुलाबराव पाटील यांनी कठोर कारवाई करण्याचे निर्देश कालच दिले होते. पालकमंत्र्यांच्या निर्देशानंतर शाखा अभियंता आर. आर. ठाकूर व अनुरेखक हरचंद खंडू हजबन यांना निलंबीत करण्यात आले आहे.
यासंदर्भात अधिक असे की, महाराष्ट्र जीवन प्राधीकरण अर्थात मजिप्रा या विभागाच्या जळगाव येथील कार्यालयात भर दिवसा कर्मचारी मद्य प्राशन करत असल्याचा व्हिडीओ वृत्त प्रकाशित झाल्यानंतर खळबळ उडाली होती. या वृत्ताची दखल घेत पालकमंत्री ना. गुलाबराव पाटील यांनी कालच कठोर कारवाई करण्याचे निर्देश दिले होते. या नुसार आज चौकशी करण्यात आली असता मद्य प्राशन करणारी व्यक्ती ही शाखा अभियंता आर. आर. ठाकूर असल्याचे निष्पन्न झाले. तर त्यांच्या सोबत हरचंद खंडू हजबन हे अनुरेखक म्हणून काम करणारे असल्याचे दिसून आले.
आज महाराष्ट्र जीवन प्राधिकरणाच्या नाशिक कार्यालयातील प्रमुख प्रशांत भामरे यांनी निर्देश जारी करत मजिप्रा जळगाव कार्यालयाचे शाखा अभियंता आर. आर. ठाकूर व अनुरेखक हरचंद खंडू हजबन यांना निलंबीत करण्याचे आदेश काढले आहेत. निलंबनाच्या काळात ठाकूर यांना मजिप्रा उपविभाग कार्यालय नंदुरबार येथे हजेरी लावण्याचे बंधनकारक करण्यात आले आहेत. तर हजबन यांना एरंडोल येथे हजेरी लावण्याचे सांगण्यात आले आहे. या दोन्ही जणांसोबत सेवानिवृत्त उपअभियंता टि. एस. गाजरे हे देखील ओल्या पार्टीत असल्याचे आढळून आले होते. त्यांना सहा महिन्यांसाठी करारावर घेण्यात आले होते. या प्रकरणानंतर त्यांचा करार रद्द करण्यात आला आहे.
