अमळनेर (प्रतिनिधी) हॉटेल मालकानेच वेटरच्या डोक्यावर लोखंडी वस्तूने मारहाण करून त्याचा खून केल्याचा प्रकार तब्बल तीन महिन्यांनी उघडकीस आला आहे. दगडू उर्फ बाबूभाई नारायण पाटील असे मयतांचे नाव असून नरेंद्र उर्फ भटू दशवंत चौधरी (वय ३५) राहणार माळीवाडा, अमळनेर असे आरोपीचे नाव आहे. हॉटेलबाहेर लावलेल्या सीसीटीव्हीतून हा प्रकार उघडकीस आला आला.
नेमकं काय घडलं !
हॉटेल मालक नरेंद्र चौधरी याने दि. २२ एप्रिल रोजी अमळनेर पोलिस स्टेशनला माहिती दिली की, सकाळी सहा वाजता दगडू पाटील खाली दगडावर पडलेला होता. त्याच्या डोक्याला जखम व छातीला खरचटले होते. तेथून नरेंद्र याने खासगी रुग्णवाहिकेने धुळे येथे उपचारासाठी दाखल केले होते. तेथून त्याला सुरत येथे उपचारासाठी नेण्यात आले. दि. ६ मे रोजी त्याचा सुरत येथे मृत्यू झाला होता. अमळनेर पोलिस स्टेशनला आकस्मिक मृत्यूची नोंद केली होती. मात्र, सुरत येथील शवविच्छेदन अहवाल आणि नरेंद्र चौधरी याने दिलेल्या माहितीत तफावत आढळून आली. त्यामुळे पोलिसांचा संशय बळावला.
सीसीटीव्ही फुटेजमधून उघड झाला गुन्हा !
पोलिसांनी घटना स्थळजवळील सीसीटीव्ही फुटेज तपासले असता २२ रोजी पहाटे मालक नरेंद्र चौधरी हा वेटर दगडू पाटील याला मारहाण करीत होता. दगडू खाली पडल्यावर त्याच्या छातीवर होक्याल बुक्क्यांनी मारहाण करीत होता. तसेच जवळील पडलेली लोखंडी वस्तू उचलून दगडूच्या डोक्यावर तीन वार केले. डोक्यात दगडही मारला. दगडू याचा मृत्यू नरेंद्र याच्या मारहाणीनेच झाला असल्याचे निष्पन्न झाल्याने पोलीस घनश्याम अशोक पवार यांच्या फिर्यादीवरून नरेंद्र चौधरीविरुद्ध खुनाचा मुन्हा दाखल करण्यात आला आहे. दरम्यान, नरेंद्र चौधरी याची अमळनेर परिसरातच साई व रूपाली हॉटेल आहे. दगडू पाटील हा तेथे वेटर होता. दगडू गेल्या पंधरा वर्षांपासून आपल्या सुरत येथे राहणाऱ्या कुटुंबापासून वेगळा राहून तेथे काम करीत होता.
