मुंबई (वृत्तसंस्था) भाजप नेते किरीट सोमय्या यांच्या आक्षेपार्ह व्हिडीओसंदर्भात विरोधी पक्षनेते अंबादास दानवे यांनी पेनड्राईव्ह बॉम्ब फोडला आहे. आठ तासांचे व्हिडीओ मी सभापतींना देत आहे, असे म्हणत दानवेंनी चौकशी करण्याची मागणी केली आहे.
नेमकं काय झालं सभागृहात !
भाजप नेते किरीट सोमय्या यांच्या कथित अश्लील व्हिडिओच्या मुद्द्यावरून आज विधान परिषदेत विरोधक प्रचंड आक्रमक झाले. विरोधी पक्षनेते अंबादास दानवे यांनी या मुद्द्यावरून आक्रमक होत सोमय्यांनी मराठी महिलांचा गैरफायदा घेतल्याचा आरोप केला. तसेच सोमय्या यांच्या कथित ८ तासांच्या व्हिडिओचा पेन ड्राईव्ह त्यांनी उपसभापती नीलम गोऱ्हे यांच्याकडे सोपवला.
सोमय्यांकडून मराठी महिलांचा गैरफायदा !
अंबादास दानवे म्हणाले की, अनेकांना इडीची भीती दाखवून ब्लॅकमेल केलं जातंय, आठ तासांचे व्हिडिओ आहेत. ते मी सभापतींना देत आहे. ही व्यक्ती महाराष्ट्र द्रोही आहे. मी त्यांचं नाव देखील सांगतो, किरीट सोमय्या असं या व्यक्तीचं नाव आहे. मराठी महिलांचा सोमय्यांकडून गैरफायदा घेतला गेला. सोमय्यांमुळे अनेकांचं आयुष्य उद्ध्वस्त झालं आहे. त्यामुळे या प्रकरणाची सविस्तर चौकशी करावी असे म्हणत अंबादास दानवे यांनी किरीट सोमय्यांवर हल्लाबोल केला. यावेळी विरोधकांकडून सभागृहात ‘लाव रे तो व्हिडिओ’ अशी घोषणाबाजी केली.
तुम्ही दिलेला पेनड्राईव्ह पाहणं माझ्यासाठी फार कठीण परीक्षा- नीलम गोऱ्हे !
तुम्ही पेन ड्राईव्ह मला दिला आहे, तो बघणं म्हणजे माझ्यासाठी फार कठीण परीक्षा आहे. पण मी त्यामध्ये महिला पोलीस अधिकारी, महिला डॉक्टर या मान्यवराना ते बघायला सांगेन. तसेच सदर महिलेची तक्रार आली पाहिजे, असं विधानपरिषदेच्या उपसभापती नीलम गोऱ्हे म्हणाल्या.
विषय अतिशय गंभीर : देवेंद्र फडणवीस !
देवेंद्र फडणवीस म्हणाले, “हा विषय अतिशय गंभीर आहे. राजकारणात असे अनेक प्रसंग येतात ज्यामुळे माणसाचे सर्व राजकीय आयुष्य पणाला लागतं. माझ्याकडे तक्रारी द्या मी चौकशी करतो. संपूर्ण प्रकरणाची सखोल चौकशी होईल. ती महिला कोण आहे, हे जाहीर करणार नाही. मात्र कुणालाही पाठीशी घालणार नाही. “आम्ही वरिष्ठ स्तरावर चौकशी करणार आहोत. अनिल परब यांनी मांडलेला विषय गंभीर आहे. कोणतही प्रकरण दाबल्या जाणार नाही. कायद्याच्या चौकटीत राहून तपास केला जाईल”, असे देवेंद्र फडणवीस म्हणाले.
व्हिडिओ खरा असल्याचे सोमय्यांनी अप्रत्यक्षपणे मान्य केले : अनिल परब !
सोमय्या यांनी अनेकांना खोटे आरोप करून त्रास दिला आहे. असे असले तरी त्यांना त्रास देण्याचा आमचा उद्देश नाही. परंतु या प्रकरणाची सखोल चौकशी करावी. हवं तर एसआयटी नेमावी. व्हिडिओ खरा आहे, असं अप्रत्यक्षपणे सोमय्या यांनी मान्य केलं आहे, असे अनिल परब यांनी या विषयावर सभागृहात बोलताना म्हणाले.
