नागपूर (वृत्तसंस्था) नागपूरच्या यशोधरा नगरमध्ये एक धक्कादायक घटना घडली आहे. एका बलात्कार पीडित तरुणीने गर्भवती झाल्यावरती गर्भपात करण्यासाठी युट्यूब व्हिडिओ पाहिला आणि गर्भपात करण्याचा प्रयत्न केला. त्यानंतर या तरुणीची प्रकृती अचानक बिघडली आणि हा सगळा प्रकार उघड झाला. तरुणीच्या आई – वडिलांना या संदर्भात माहिती समजताच आरोपी विरुद्ध तक्रार दाखल केली आहे.
आरोपी सोहेल वहाब खान आणि पीडित तरुणीमध्ये गेल्या सहा वर्षांपासून प्रेम संबंध आहेत. या दरम्यान आरोपीने पीडित तरुणीचे अनेक वेळा लैंगिक शोषण केले, त्यामुळे तिला गर्भधारणा झाली. या संदर्भात पीडित तरुणीने आरोपी सोहेल याला सांगितले असता त्याने जबाबदारी झटकण्याचा प्रयत्न केला. त्यावेळी त्याने पीडितेला अबोर्शन करण्याचा सल्ला दिला. दवाखान्यात जाऊन अबोर्शन केल्यास कुटुंबीयांना याची माहिती कळेल, या भीतीने पीडित तरुणीने चक्क युट्यूबवरील व्हिडिओ बघून स्वतःचे अबोर्शन केले. त्यानंतर देखील सर्वकाही सुरळीत सुरू असताना पीडितेची प्रकृती बिघडली असताना तिच्या आई – वडिलांना या संपूर्ण प्रकारची माहिती समजली. त्यांनी लगेच यशोधरनगर पोलीस ठाण्यात जाऊन आरोपी सोहेल वहाब खान विरुद्ध गुन्हा दाखल केला. सोहेल आधीच विवाहित असून त्याला एक अपत्यही आहे. मात्र, त्याने पीडितेला खोटी आश्वासने देऊन प्रेमाच्या जाळ्यात ओढले. या घटनेनंतर यशोधरा पोलिसांनी आरोपीला अटक केली आहे.
दरम्यान, पीडित तरुणीने युट्यूबवरील व्हिडिओ बघून स्वतःचे अबोर्शन केल्यानंतर त्या भ्रूणचे काय करावे, हा प्रश्न दोघांसमोर निर्माण झाला होता. आरोपी सोहेल याने ते भ्रूण चक्क स्मशानभूमीत दफन केल्याची माहिती समोर आली आहे. पीडित तरुणीच्या तक्रारीनुसार पोलिसांनी आरोपी विरुद्ध बलात्काराचा गुन्हा दाखल केल्यानंतर त्याला अटक केली आहे.
