वडगाव मावळ (वृत्तसंस्था) लोहगड ग्रामपंचायतीमध्ये सोलर प्रकल्पाच्या कामाची ऑर्डर काढण्यासाठी येथील विस्तार अधिकाऱ्याला ४० हजार रुपयांची लाच घेताना रंगेहात अटक करण्यात आली. ही कारवाई गुरुवारी (दि. ५) दुपारी तीन वाजता मावळ पंचायत समिती कार्यालयात करण्यात आली. अंकुश किसन खांडेकर (वय ५७ रा. मावळ पंचायत समिती ता. मावळ जि. पुणे) असे संशयित आरोपी विस्तार अधिकाऱ्याचे नाव आहे.
तक्रारदार ठेकेदार यांना लोहगड ग्रामपंचायत हद्दीत सोलार प्रकल्प कामाची ऑर्डर निघाली होती. ती ऑर्डर देण्यासाठी विस्तार अधिकारी अंकुश खांडेकर यांनी तक्रारदार ठेकेदार यांना ४० हजार रुपयांच्या लाचेची मागणी केली. याबाबत लाचलुचपत प्रतिबंधक विभाग पुणे कार्यालयात तक्रार केली असता, गुरुवारी खांडेकर यांना लाच स्वीकारताना अटक केली. त्यासोबतच त्यांच्यासह आणखी एकाला लाचलुचपत प्रतिबंधक विभागाने ताब्यात घेतले आहे. दरम्यान, खांडेकर मावळातील १७ ग्रामपंचायतींवर प्रशासक म्हणून कार्यरत असल्याचेही कळते.
