जळगाव (प्रतिनिधी) जळगाव महापालिकेवर अखेर भगवा फडकला आहे. शिवसेनेने याठिकाणी सांगली पॅटर्न राबवत भाजपाला सत्तेतून सेनेच्या महापौरपदाच्या आणि उपमहापौरपदाच्या उमेदवारांनी निर्णायक आघाडी घेतली आहे. भाजपाला हा पराभव चांगलाच जिव्हारी चांगली. भाजपाच्या या पराभवानंतर ”सत्तेचा वापर अन् आमिष दाखवून मिळवलेला हा विजय” असल्याचे विधान परिषदचे विरोधी पक्षनेते प्रवीण दरेकर यांनी सांगितले.
२०१८ मध्ये झालेल्या निवडणुकीत भाजपाने ७५ पैकी ५७ जागा जिंकत स्पष्ट बहुमत मिळविले होते. मात्र, अडीच वर्षांतच भाजपाला महापालिकेतील सत्ता गमवावी लागली आहे. आ. सुरेश भोळे यांच्याविरुद्ध असलेली नाराजी, भाजपाकडून देण्यात आलेल्या उपमहापौर पदाच्या उमेदवाराला असलेला विरोध यामुळे भाजपाचे तब्बल २७ नगरसेवक शिवसेनेला जाऊन मिळाले. त्यानुसार गुरुवारी झालेल्या ऑनलाइन निवडणुकीत शिवसेनेने यश मिळवले.
भारतीय जनता पक्षाचे तब्बल २७ नगरसेवक गळाला लावत शिवसेनेने जळगाव महापालिकेत सांगली पॅटर्नच्या धर्तीवर सत्तांतर घडवून आणले. महापौर पदासाठी झालेल्या निवडणुकीत शिवसेनेच्या जयश्री महाजन विजयी झाल्या. त्यांनी भाजपाच्या प्रतिभा कापसे यांचा १५ मतांनी पराभव केला, तर उपमहापौरपदी भाजपाचे बंडखोर कुलभूषण पाटील विजयी झाले. भाजपाचे उमेदवार सुरेश सोनवणे यांचा त्यांनी १५ मतांनी पराभव केला.
