रायपूर (वृत्तसंस्था) येथील एका हॉटेलमध्ये डॉक्टरचा मृतदेह लटकलेला आढळला. विशेष म्हणजे ही आत्महत्या नसून सुनियोजित खून असल्याचे समोर आले आहे. संबंधित डॉक्टरचा त्याचाच मित्राने गळा दाबून खून केल्याचे सांगण्यात येत आहे. आपल्या आईशी अनैतिक संबंध असल्याच्या संशयातून त्याने हे कृत्य केले आहे.
नेमकं प्रकरण काय ?
ही घटना छत्तीसगडची राजधानी रायपूरमध्ये घडली आहे. मृत डॉक्टर हा मध्य प्रदेशातील रहिवासी आहे. रायपूरच्या गुरूनानक चौकात हॉटेल संदीपच्या खोलीत मध्यप्रदेशच्या शहडोल येथील रहिवासी डॉ. जितेंद्र विश्वकर्मा यांचा संशयास्पद मृत्यू झाला होता. जितेंद्रने फाशी घेऊन आत्महत्या केल्याचे दिसत असले तरी, हॉटेलमध्ये एकत्र राहणारा त्याचा मित्र अजय निषाद याने त्याचा गळा दाबून खून केला होता. खून केल्यानंतर आरोपीने मृतदेह फासावर लटकवला होता.
पोलिसांनी दिलेल्या माहितीनुसार, आरोपी अजय जितेंद्रसोबत त्याच्या बहिणीच्या मार्कशीटचे नूतनीकरण करण्यासाठी रायपूरला आला होता. खुनाच्या घटनेपूर्वी दोघांमध्ये जोरदार वाद झाला. या वादानंतर अजयने जितेंद्रची हत्या केली. हॉटेलच्या व्यवस्थापकाने आणि तिथे राहणाऱ्या इतर लोकांनीही चौकशीदरम्यान दोघांमध्ये झालेल्या वादाबद्दल पोलिसांना माहिती दिली.
सूत्रांकडून मिळालेल्या माहितीनुसार, आरोपी अजय निषादच्या आईचे डॉ. जितेंद्र विश्वकर्मा यांच्याशी अनैतिक संबंध होते. यावरून त्यांच्यात नेहमी वादही होत असे. मात्र, जितेंद्र असे काहीही नसल्याचे सांगत असे. तपासादरम्यान मृतांच्या नातेवाईकांनी पोलिसांना या गोष्टींची माहिती दिली आहे. जितेंद्रची हत्या केल्यानंतर अजयने हॉटेलच्या खोलीला बाहेरून कुलूप लावले आणि तो निघून गेला. सध्या या प्रकरणात नवीन तथ्य समोर आल्यानंतर पोलिसांनी आरोपी अजय निषाद विरोधात खुनाचा गुन्हा दाखल केला आहे. गंज पोलीस या प्रकरणाचा तपास करत आहेत.
