नागपूर (वृत्तसंस्था) चंद्रपूर जिल्ह्यातील एका खूनाच्या प्रकरणात न्यायालयाने चक्क सिगरेटचा तुकडा पुरावा म्हणून ग्राह्य धरत आरोपीला पत्नीच्या हत्येबद्दल जन्मठेपेची शिक्षा सुनावली आहे.
चंद्रपूर जिल्ह्यातील बल्लारशह पोलीस स्टेशन अंतर्गत २०१५ मध्ये महिलेची हत्या करण्यात आली होती. विवाहबाह्य संबंधामुळे पती-पत्नी दरम्यान वाद होऊन भांडण होत असे. या वादातून पत्नी सविता जावळे हिची पती रमेश जावळे यांने हत्या केली, असा त्यांच्यावर आरोप करण्यात आला होता. या प्रकरणाची नागपूर खंडपीठात सुनावणी करण्यात आली. या हत्येप्रकरणी न्यायालयाने सिगारेटचा एक तुकडा पुरावा म्हणून ग्राह्य धरत पतीला शिक्षा ठोठवली आहे.
दोषी पती रमेश जावळे याने हत्येचा दिवशी आपण घटनेच्या ठिकाणी नव्हतो, आपण त्या दिवशी नागपूरला गेलो होतो, असा दावा केला होता. पण घटनास्थळी मिळालेल्या सिगारेटच्या तुकड्यावरून आणि त्याला लागलेल्या थुंकीच्या डीएनए चाचणीचा अहवाल महत्वाचा पुरावा मानून न्यायालयाने आरोपी पतीचा स्वतःच्या बचावासाठी केलेला दावा खोटा मानला.
शिवाय पत्नीच्या हत्येसाठी रमेश याने वापरलेल्या काठीवर लागलेले रक्ताचे डाग तसेच त्याच्या कपड्यांवर लागलेले रक्ताच्या डागाचे डीएनए चाचणीत ते सारख्या व्यक्तीचे असल्याचे सिद्ध झाले होते. त्यानंतर नागपूर खंडपीठाने जिल्हा व सत्र न्यायालयाने रमेश जावळे याला दिलेली जन्मठेपेची शिक्षा कायम ठेवली.
