नाशिक (वृत्तसंस्था) नाशिक शहरात पुन्हा एकदा कडक लॉकडाऊनची घोषणा करण्यात आली आहे. १२ मे ते २२ मे दरम्यान हा कडक लॉकडाऊन लागू असणार आहे. यामध्ये केवळ अत्यावश्यक सेवा, मेडिकल आणि हॉस्पिटल सुरू राहणार आहेत. कोरोनाची साखळी तोडण्यासाठी महापालिका आयुक्त कैलास जाधव यांनी हा निर्णय घेतला आहे.
दुसऱ्या लाटेमुळे देशात आणि राज्यात अभूतपूर्व परिस्थिती निर्माण झाली असून, विषाणू संसर्ग रोखण्यासाठी राज्य सरकारने प्रतिबंधात्मक उपाय म्हणून सुरूवातीला नाईट कर्फ्यू व नंतर संचारबंदी लागू केली होती. त्यानंतर निर्बंध कडक करण्यात आले. मात्र, त्यामुळे कोरोना रुग्णवाढीला ब्रेक लागला असला, तरी त्यामध्ये घट झालेली नाही. तर दुसरीकडे अनेक जिल्ह्यातील ग्रामीण भागातही कोरोनाचा संर्सग पोहोचल्यानं चिंता वाढली आहे. त्यामुळे आता जिल्हा स्तरावर कडक लॉकडाउनचा उपाय निवडला जात आहे. नाशिक शहरातील परिस्थितीही चिंता वाढवणारी असून, महापालिका आयुक्त कैलास जाधव यांनी लॉकडाउन करण्याचा निर्णय घेतला आहे.
नाशिक महापालिका आयुक्तांनी निर्णयाची माहिती दिली. १२ मेपासून शहरात कडक लॉकडाउन केला जाणार आहे. दहा दिवसांसाठी लॉकडाउन असणार आहे. १२ मे रोजी दुपारी १२ वाजता कडक लॉकडाउनची सुरूवात होईल. त्यानंतर २२ मे रोजी दुपारी १२ वाजता लॉकडाउनची मुदत संपेल. या कालावधीत सर्व सेवा आणि दुकानं बंद राहणार असून, फक्त हॉस्पिटल आणि मेडिकल सुरू राहणार आहेत. या काळात कुणालाही घराबाहेर पडता येणार नाही,” अशी माहिती आयुक्त जाधव यांनी दिली.
राज्यात कोरोना रुग्णांमध्ये घट होत असली तरी संकट अजूनही कायम आहे. कोरोनाची तिसरी लाट आणखी किती घातक असेल हे सांगता येत नाही. त्यामुळे आतापासून त्यावर उपाययोजना करण्याची तयारी सुरु झाली आहे. कोरोनाचा संसर्ग रोखण्यासाठी लॉकडाऊन हाच एक पर्याय आहे. त्यामुळे संसर्ग वाढल्यानंतर शहरात लॉकडाऊन करण्याची वेळ येते. लोकांमध्ये अजूनही गांभीर्य दिसत नसल्याने कोरोना रुग्णांमध्ये वाढ पाहायला मिळत आहे.
